Túrkistan qalasynda 1 mln sharshy metrge jýyq aýmaq dezınfektsııalandy

TÚRKІSTAN. QazAqparat - Túrkistan oblysynda indettiń taralýyna tosqaýyl qoıý maqsatynda dezınfektsııalyq rejım kúsheıtildi. Tek oblys ortalyǵynyń ózinde búginge deıin 1 mln sharshy metrge jýyq jer, ıaǵnı, 557 nysan tolyq tazalanyp, zalalsyzdandyrylǵan, dep habarlaıdy QazAqparat oblys ákiminiń baspasóz qyzmetine silteme jasap.

Joldar, aıaqjoldar, aıaldamalar, saýda dúkenderiniń syrtqy aımaqtarynda dezınfektsııalyq óńdeý jumystary júıeli júrgizilýde.

Túrkistan oblystyq taýarlar jáne qyzmetterdiń sapasy men qaýipsizdigin baqylaý departamentiniń málimetinshe, bul aýmaqtar arnaıy nusqaýlyqtan ótken dezbrıgadalar kómegimen arnaıy eritindimen jýylady, zalalsyzdandyrylady.

Sanıtarlyq-epıdemıologııalyq sharalardy qorǵaný kıimderin kıgen arnaıy top júzege asyrýda. Olardyń qatarynda erikti sarbazdardan arnaıy jasaqtalǵan áskerıler de bar. Osy maqsatta Túrkistan qalasynyń aýmaǵy 17 sektorǵa bólindi. Osylaısha, shahardaǵy zalalsyzdandyrý jumystarynyń kólemi men nysandary naqtylandy. 4 arnaıy ruqsaty bar dezınfektsııalaý bólimderi Túrkistandaǵy barlyq nysandarda jappaı tazartý jumystaryn júrgizýde. Avtobýs aıaldamalaryn arnaıy nusqaýlyqtan ótken dezbrıgadalar zalalsyzdandyrýda.

Qalaaralyq jolaýshy tasymaldaý, qalalyq qoǵamdyq kóliktiń qozǵalysy toqtatyldy. Turǵyn úılerdiń kireberisteri men aýlalaryn kestege sáıkes tazalanýda. Dezınfektsııa júrgizý kezinde adam densaýlyǵyna zııan keltirmeý úshin óńdeýden deıin 5 saǵat ishinde kóshege shyǵýǵa tıym salynady.

Tótenshe jaǵdaı men engizilgen karantın erejeleriniń saqtalýyn qamtamasyz etý úshin barlyq aýdandarda arnaıy mobıldi toptar quryldy. Turǵyndardyń ótinishteri aýdan ákimdikterinde ashylǵan biryńǵaı baılanys jelisi ne oblystyq call-ortalyqtyń 109 nómiri arqyly qabyldanýda.