Túrkistan qalasyna keletin týrıster sany 5 mıllıonǵa jetedi
ASTANA. QazAqparat - Túrkistan qalasyna keletin týrıster sany 5 mıllıonǵa jetedi. Bul týraly búgin oblys ákimi Janseıit Túımebaev Ortalyq kommýnıkatsııalar qyzmetiniń Túrkistan qalasynda ótkizgen kóshpeli baspasóz konferentsııasynda málimdedi.
«Elbasy Túrkistandy rýhanı ári týrıstik ortalyq retinde damytý mindetin júktedi. Kúni keshe ǵana Túrkistan qalasyna mıllıonynshy saıahatshy keldi. Olar - AQSh azamattary. Týrıster sany ótken jyldyń osy kezeńimen salystyrǵanda 57,2 paıyzǵa artty. Biz óńirdiń týrıstik potentsııalyn tıimdi paıdalanýymyz qajet. Túrkistan oblysynda týrızmdi keshendi damytý maqsatynda 2018-2025 jyldarǵa arnalǵan týrıstik ındýstrııany damytý tujyrymdamasy ázirlendi. Osy jumystar nátıjesinde 2025 jylǵa qaraı Túrkistanǵa keletin saıahatshylar sanyn 5 mıllıonǵa jetkizýdi kózdep otyrmyz», - dedi J.Túımebaev.
Túrkistan oblysynda týrızm salasyn damytý maqsatynda 3 qonaq úı, 1 hostel, 2 shıpajaı jáne 1 týrıstik uıym ashylsa, jyl sońyna deıin 14 týrıstik nysan (qonaq úıler, demalys aımaqtary, shıpajaılar jáne t.b.) iske qosylýy josparlanýda. Óńirde «Qasqasý» taý-shańǵy kesheni jobasy, Saryaǵash kýrort aýmaǵyn keńeıtý, Shardara sý qoımasy aýmaǵynda jaǵajaı týrızmin damytý, Túrkistan qalasyn týrıstik ortalyq retinde damytý jobalary qolǵa alynýda.
Eske sala keteıik, 30 qazan kúni Túrkistan qalasynda 1 mıllıonynshy týrıst anyqtaldy. Oblys ákimi AQSh-tan kelgen qonaqtarǵa kádesyı tabystady.
