Túrkistan qalasyn kógaldandyrýǵa erekshe kóńil bólinbek
TÚRKІSTAN. QazAqparat - Túrkistan qalasyn sýlandyrý júıesi qarqyndy júrýde, dep habarlaıdy QazAqparat tilshisi.
Osy maqsatta qalanyń birneshe baǵytynan keletin kishi kanaldardy kúrdeli jóndeýden ótkizip, qala ishindegi aryqshalarǵa sý tartý josparlanǵan bolatyn. Búginde Qarashyq ózeninen bastaý alatyn 5,2 shaqyrymdy Qotyrbulaq kanaly tazalanyp, 7 kópirshe salynady. Atalǵan kanaldan qazirgi tańda 5-10 tekshe metr sý «Arys -Túrkistan» magıstraldy kanalyna quıylýda.
Sonymen qatar, qala aýmaǵyn sýlandyrý maqsatynda «Arys - Túrkistan» magıstraldy kanalynan bosatylatyn kishi aryqtarǵa iske qosyldy. Osy arqyly qalaǵa kire beris qaqpanyń tómengi jaǵyndaǵy kósheler men Sattarhanov dańǵyly boıyndaǵy aǵashtar sýlandyrylýda.
Sondaı-aq, Halyqaralyq qazaq-túrik ýnıversıtetine qarasty botanıkalyq baqtaǵy aǵashtar sý alyp jatyr. Qaladaǵy kóshelerge sý keltirý de josparlanyp otyr. «Túrki baǵy» jáne «Qarakóz» qorymy mańyndaǵy egilgen aǵashtar da sýlandyrylýda. Ǵ.Muratbaev kóshesindegi ırrıgatsııalyq aryqshalar men Táýke han dańǵyly, S.Erýbaev kóshelerin sýlandyrýǵa tolyq múmkindik bar. Bul maqsatta barlyq kanaldardy jóndeý, tazalaý baǵytyndaǵy jumystar jalǵasatyn bolady. Aǵymdaǵy jyly ortalyq aımaqtyń 47 kóshesine 54,1 shaqyrym aryqshalar ornatylmaq.
Aldaǵy ýaqyttarda Rýhanı-mádenı ortalyqta, Ákimshilik iskerlik ortalyqta jáne irgeles jatqan aýmaqtaǵy kóshelerde salynatyn joldardyń boıyna jobamen 100 shaqyrym aryqshalar ornatý qarastyrylýda. Bul jobalardyń barlyǵy Túrkistannyń ekologııasyn ońaltyp, klımatyn jaqsartý úshin jasalatyn oń qadamdar bolyp otyr.
