Túrkistan qalasyn abattandyrý jumysy qalaı júrip jatyr

TÚRKІSTAN. QazAqparat - Túrkistan qalasynda qyzý júrip jatqan kórkeıtý men abattandyrý jumystarynyń barysyn baqylaǵan oblys ákimi Ómirzaq Shókeev 32 sektorda atqarylǵan jumystarmen tanysty, dep habarlaıdy QazAqparat.

Túrkistan oblysy ákimi baspasóz qyzmetiniń málimetinshe, qalany kórkeıtý, abattandyrý úshin shahar aýmaǵy 32 sektorǵa bólingen.

Ár sektorǵa aýdan, qala ákimdikteri men basqarma basshylary tikeleı jaýapty.

Qala aýmaǵyna aǵashtar otyrǵyzylyp, kóshelerde jaryq shamdar, qoqys jáshikteri ornatylyp, balalar alańqaılary, demalys oryndary salynýda.

Keshendi jumys barysyn baqylaǵan oblys basshysy aýqymdy jumystardyń turaqty túrde júzege asýyn qatań baqylaýdy tapsyryp, jaýaptylarǵa birqatar tapsyrmalar júktedi.

Ár sektorǵa 10-15 kóshe bekitilgen. Onda jer tegistelip, 10 myńǵa jýyq aǵash otyrǵyzý, sý uńǵymalaryn qazyp, tamshylap sýǵarý júıesine qosý jumystaryn júrgizý júktelgen.

Egilgen aǵash kóshetteri jelden qulap, synbaý úshin symmen ne jippen bekitip, baılaý jumystary qosa júrgiziledi.

Budan bólek, senbilikter uıymdastyryp, aǵashtar áktelip, kúl-qoqystan tazartylýda.

Gazon egilip, gúl egetin qumyralar qoıylǵan. Jaryqtandyrylyp, kógaldandyrylýda.

Sonymen qatar jańa áýejaı aýmaǵyna 140 myń túp túp shaǵan, úıeńki, qaraǵash, bozarsha, jıde aǵash kóshetteri otyrǵyzyldy.

Aldaǵy 2-3 jylda bul aımaq jaıqalyp, qalyń ormanǵa aınalady. 28 ga quraıtyn qalalyq dendrobaqta 12 myńnan astam aǵash otyrǵyzylady.

Túrkistan qalasynyń bas josparyna sáıkes, oblysta alǵashqy ret 7 700 ga aýmaqqa «Jasyl beldeý» qurý jumystary júrgizilýde.

2019 jyly qolǵa alynǵan aýqymdy is-shara aıasynda ótken jyly 1 mln - nan astam kóshet otyrǵyzyldy. Josparlanǵan meje bıyl tolyǵymen iske asady.

ıAǵnı, shahardyń klımatyn ózgertý úshin jyl sońyna deıin 3 myń gektar aýmaqqa sanalýan aǵashtar otyrǵyzylady.

Aǵyn sý tapshylyǵyn sheshý maqsatynda «Túrkistan oblysyn áleýmettik - ekonomıkalyq damytýdyń 2024 jylǵa deıingi keshendi jospary» aıasynda iri sý nysandary qurylystary júrgizilýde.

Atap aıtsaq, «Túrkistan magıstraldyq arnasy» kúrdeli jóndeýden ótip jatyr.

Syıymdylyǵy 18 mln tekshe metr (m/3) Keńsaı - Qosqorǵan-2» sý qoımasy salynyp, «Jetikól kólder júıesin» qaıta jańǵyrtý jumystary júrgizilip jatyr.

Túrkistan magıstraldyq arnasyn toltyrý úshin Syrdarııa ózeninen mashınalyq kanal salyndy.

Aýqymdy istiń nátıjesinde jylyna aǵyn sý paıdalaný kólemi qosymsha 200 mln. (m/3) artty.