Túrkistan qalasy jıhaz óndirýden kósh bastap keledi
TÚRKІSTAN. QazAqparat - Túrkistan qalasy oblys kóleminde jıhaz óndirisinen aldyńǵy orynda tur. Qalanyń óńdeý ónerkásibindegi óndiristiń 20 paıyzyn osy qatty jáne jumsaq jıhaz óndirisi quraıdy, dep habarlaıdy Túrkistan qalasy ákiminiń baspasóz qyzmeti.
Baspasóz málimetterine qaraǵanda, búginde oblystyń ortalyǵynda 7 iri kásiporyn bar, sondaı-aq taǵy birqatar shaǵyn jıhaz tsehtary bar.
Oblysta jumysyn júrgizip otyrǵan, jıhaz óndirisinde ózindik orny Garand Mıks, Azııa brend, Mebel lıýks, Kordıal - Túrkistan syndy kásiporyndarynyń ónimderi elimizdiń ózge oblystarymen qatar TMD elderine shyǵarylady.
Atap aıtar bolsaq, óz jumysyn 2013 jyly shaǵyn ǵana tsehtan bastaǵan «Azııa brend» (IP-Abıshev) ónimderi elimizdiń birqatar óńirlerine taraıdy.
Kásipkerliktiń irgesin keńeıtken bul kásiporyn búginde túrkistandyq 60 turǵyndy jumyspen qamtyp otyr. Shaǵyn kásipkerlikti memleket qoldaýymen bastaǵan bul tsehta jıhazdarǵa qajetti shıkizatty árleý ónimderi de osy jerde daıyndalady. 
Tsehtyń jyldyq ónimdiligi - 10 myń dana jıhaz toptamasy. Sondaı-aq, búginde jıhaz toptamasyna qajetti qosalqy bólshekter men materıaldardyń 80 paıyzy ózderinen shyǵady. Buryndary Tashkent, Qytaı elderinine tasymaldanǵan ónimderdi endi tsehta óndirilip, óndiristiń tıimdiligin arttyryp, baǵa turaqtylyǵyn saqtap otyr.
Qazir fabrıkadaǵy jumystyń 80-90 paıyzy avtomattandyrylǵan. Tsehtaǵy jumys ıtalııalyq stanoktardyń kómegimen júrgizilýde. Jobalyq quny - 20 mıllıon teńge. Ónimniń sapasyn jaqsartyp, kólemin arttyrý úshin kásiporyn qyzmetkerleri sheteldik mamandarmen tájirıbe almastyryp otyrady.
Sondaı-aq, Túrkistandaǵy ındýstrıaldy aımaqtaǵy úlken jobalardyń biri - «Grand Mıks» kásiporynynyń ónimderi elimizdiń barlyq óńirlerine tanys. Sebebi, fabrıka ónimderi Qazaqstannyń 14 oblysyna jáne Qyrǵyzstannyń Bishkek, Osh qalalaryna jiberiledi.
Qazirgi tańda Reseı, Ázerbaıjan elderinen de suranystar qabyldaýda. Jıhaz ónimderiniń birneshe túrin shyǵaratyn «Grand Mıks» mekemesi jylyna 1,5-2 mlrd. qarjynyń ónimin óndiredi. Onda búginde jergilikti turǵyndardan 145 jumysshy eńbek etedi.
Oblys ortalyǵy Túrkistan qalasynda aldaǵy ýaqytta kásipkerlikti, ónerkásipti damytýǵa basa mán berilip otyr. Bul tek qalanyń kórkeıýine ǵana emes, jumyssyzdyqtyń da azaıýyna sep bolmaq.
