Túrkistan qalasy úsh baǵytta damyp keledi – Ómirzaq Shókeev
NUR-SULTAN. QazAqparat – «Túrkistan – túrki áleminiń rýhanı astanasy atty» halyqaralyq beınekonferentsııada oblys ákimi Ómirzaq Shókeev qalada jańadan boı kótergen nysandar týraly málimet berdi, dep habarlaıdy QazAqparat tilshisi.
«Túrkistan qalasy qaıta túleýdi bastady. Túbi bir túrki elderi rýhanı ortalyq retinde qasterleıtin Túrkistan qalasy qazir alyp qurylys alańyna aınaldy, damýdyń jańa satysyna kóterildi. Qala qazir 3 baǵytta damyp kele jatyr. Qoja Ahmet ıAsaýı kesenesi aýmaǵy tolyǵymen abattandyrylyp, kelýshilerge qolaıly jaǵdaı jasalýda. ıAsaýı men Rábıǵa Sultan Begim kesenelerin qalpyna keltirý, Áziret Sultan qoryq-murajaıynyń aýmaǵyn abattandyrý, Kúltóbe kóne qonysynyń tarıhı oryndaryn qalpyna keltirý jumystary qarqyndy júrgizilip jatyr. Tarıhı, mádenı ortalyq kóz qýantatyndaı jasalyp keledi. Osyndaı rýhanı, mádenı ortalyqta Vızıt ortalyǵy, «Uly dala» ortalyǵy, ıAsaýı mýzeıi, Farab kitaphanasy, teatr, respýblıkamyzdaǵy alǵashqy halyqaralyq týrıstik jáne meımandostyq ýnıversıteti sııaqty birneshe mańyzdy nysan boı kóterdi», - dedi aımaq basshysy.
Eske salsaq, 31 naýryzda TMYK-tyń beıresmı sammıti onlaın rejımde ótken bolatyn.
