Túrkistan qalasy memlekettiń rýhanı jáne tarıhı astanasy retinde damıdy
«Túrkitildes memleketterdiń yntymaqtastyq keńesiniń 2021 jylǵy sáýirde ótkizgen beıresmı sammıtiniń qorytyndysy boıynsha Túrkistan qalasyn Túrki áleminiń rýhanı astanasy dep taný týraly sheshim qabyldandy. Osyǵan baılanysty, búgingi kúni Túrkistan qalasynyń rýhanı jáne tarıhı astana retinde damýyna jaǵdaı jasaý úshin qalanyń tarıhı kelbeti men tarıhı-mádenı mura obektilerin saqtaý, dinı jáne mádenı dástúrlerdi saqtaý, mádenı jáne týrıstik obektilerdiń qoljetimdiligi, kommýnaldyq, kóliktik, tehnologııalyq ınfraqurylym men qyzmet kórsetý júıelerin damytý jónindegi máselelerdi sheshý qajet. Joǵaryda atalǵan máselelerdi sheshý jáne Túrkistan qalasyn damytý úshin tıimdi ınstıtýtsıonaldyq orta qurý úshin zań jobasyn qabyldaý kerek», - delingen Ulttyq ekonomıka mınıstrligi ázirlegen zań jobasynyń túsindirme jazbasynda.
Qujatta bul ortalyq jáne jergilikti ókildi jáne atqarýshy organdar arasyndaǵy fýnktsııalardy naqty bólý, sáýlet, qala qurylysy jáne qurylys josparlaýdy retke keltirý, qalany damytý úshin memlekettik qoldaý kórsetýdiń zańnamalyq bazasyn nyǵaıtý esebinen Túrkistan qalasyn damytýdyń biryńǵaı saıasatyn ázirleýge jáne júrgizýge múmkindik beretindigi aıtylǵan.
Zań jobasynyń maqsattary mynalar:
Túrkistan qalasynyń Qazaqstan Respýblıkasynyń rýhanı jáne tarıhı astanasy retinde jumys isteýi salasyndaǵy qoǵamdyq qatynastardy retteý;
Túrkistan qalasynyń qalyptasýy men jumys isteýi úshin quqyqtyq jáne uıymdastyrýshylyq jaǵdaılar men tetikter jasaý;
mádenı jáne dinı murany qoldaý, qasıetti oryndar men kórikti jerlerdi saqtaý jáne qorǵaý;
Túrkistan qalasyn damytý bóliginde ortalyq jáne jergilikti atqarýshy organdar arasyndaǵy úılestirý men ózara is-qımyldy jaqsartý.
Zań sheńberinde memlekettik bılik organdarynyń ókilettikteri reglamentteletin bolady:
Túrkistan qalasyn memlekettiń rýhanı jáne tarıhı astanasy retinde damytý jónindegi saıasattyń negizgi baǵyttaryn aıqyndaý;
qalanyń tarıhı kelbetin jáne tarıhı-mádenı mura obektilerin saqtaý;
Túrkistan qalasyn jáne búkil memleket nemese jekelegen ákimshilik-aýmaqtyq birlikter aýqymynda iske asyrylatyn jobalardy damytý úshin memlekettik qoldaý kórsetý.
Zań jobasy 23 tamyzǵa deıin qoǵamdyq talqylaýǵa shyǵarylǵan.
