Túrkistan qalasy 32 sektorǵa bólindi

TÚRKІSTAN. QazAqparat - Túrkistanda qaraǵash pen tez ósetin terek otyrǵyzýdy tapsyrǵan óńir basshysy Ómirzaq Shókeev oblys ortalyǵyndaǵy abattandyrý jumysymen tanysty. Іs-sharanyń oryndalýyn qatań baqylaýǵa alyp, jumysty turaqty túrde jalǵastyrýdy tapsyrdy, dep habarlaıdy QazAqparat.

Túrkistan oblysy ákimdigi baspasóz qyzmetiniń málimetine sensek, qaladaǵy kógaldandyrý jumystarymen tanysqan oblys basshysy Ordabasy, Túlkibas, Tólebı jáne Shardara aýdandaryna bekitilgen sektorlardy aralaǵan.

Kórkeıtý jáne abattandyrý maqsatynda qala 32 sektorǵa bólingen. Ár sektorǵa aýdan-qala ákimdikteri men basqarma basshylary tikeleı jaýapty. Qalany kórkeıtý bir úlgide júzege asýda.

Qala aýmaǵynda velojoldar tóselip, gazon shópteri sebilýde. Kóshelerde jaryq shamdar, qoqys jáshikteri men turǵyndardyń demalýyna arnalǵan oryndyqtar ornatylǵan.

Keshendi jumys barysyn baqylaǵan oblys ákimi jaýaptylarǵa birqatar tapsyrmalar berdi. Aımaq basshysy sapaǵa mán berip, jasyl jelekti sýarýdy jetildirýdi mindettedi.

Túrkistan shaharyn kórkeıtý, ekologııalyq jaǵdaıdy jaqsartý úshin qarqyndy jumys júrip jatqany belgili.

Ómirzaq Shókeevtiń tapsyrmasyna sáıkes, jasyl kóshetterdi jelden, sýyqtan jáne basqa da syrtqy faktorlardan qorǵaý úshin aǵashtar arnaıy symdarmen oralyp, tirektermen qorshalýda.

Keı jobalardy jasaýǵa tikeleı turǵyndar da atsalysqan.

Qala halqy demalatyn orynnyń jaıly da, yńǵaıly bolýyna túrkistandyqtar úles qosyp, #HalyqtyqJoba jasaýda.

Ómirzaq Estaıuly bul jobany úlgi retinde paıdalanýdy tapsyrdy.