Túrkistan qalasy 3 aımaq boıynsha damytylady
TÚRKІSTAN. QazAqparat - Túrkistan qalasynyń damýy boıynsha 2018-2021 jyldarǵa arnalǵan damý kontseptsııasy jasalyndy. Bul týraly búgin Túrkistan oblysynyń ákimi Janseıit Túımebaev QR Ortalyq kommýnıkatsııa qyzmeti uıymdastyrǵan kóshpeli brıfıngte aıtty, dep habarlaıdy QazAqparat.
Ákimdik taratqan habarlamaǵa qaraǵanda, tarıhı kıeli aımaq - 89 gektar; qurylys salýdy retteý aımaǵy - 98 gektar; ákimshilik-iskerlik ortalyǵy - 700 gektar aýmaqta ornalasqan.
Aımaq basshysy baıandamasynda 3 aýmaq boıynsha boı kóteretin ǵımarattardy atap ótti.
«Birinshi aımaq: Túrkistan qalasyndaǵy tarıhı kıeli aımaqta ornalasqan H.A.ıAsaýı kesenesiniń aýmaǵyndaǵy 89 gektar jer telimine amfıteatr, sý burqaqtary, mádenı demalys oryndary, vızıt ortalyǵy jáne ashyq aspan astyndaǵy murajaı ǵımarattattary boı kóteretin bolady. Ekinshi aımaq: qurylys jumystaryn retteý aımaǵyna «Qazaqstan-Nazarbaev» ortalyǵy, «Qazaq handary, bıleri» ortalyǵy, Shyǵys monshasy, «Uly dala eli» ortalyǵy, Túrki áleminiń ortalyǵy, H.A.ıAsaýı ortalyǵy, Astana saıabaǵy, Beıneleý-óner murajaıy jáne Tarıhı-mádenı oryndar ortalyǵynyń ǵımarattary salynady. Úshinshi aımaq: ákimshilik iskerlik ortalyǵyn damýy aımaǵynda 700 gektar jer telimin 3 kezeńge bólip qarastyrylýda», - dedi Janseıit Qanseıituly.
Qazirgi tańda, Túrkistan qalasyn túrki áleminiń mádenı-rýhanı ortalyǵy retinde damytýdyń bas jospary tujyrymdamasyn ázirleý maqsatynda konkýrs uıymdastyrlyp, ótkizildi.
Barlyǵy 22 joba joldansa, onyń 15-i zańdy tulǵalar jáne 7-i jeke tulǵalar konkýrsqa qatysty. Sonyń ishinde, Túrkııadan-2, Koreıa elinen-2, Óskemen qalasynan-1, Almaty qalasynan-6, Astana qalasynan-6, Shymkent qalasynan-4, Túrkistan qalasynan-1.
Memlekettik komıssııanyń sheshimine sáıkes, 2018 jyldyń 29 qyrkúıek kúni Elbasynyń Túrkistan oblysyna is-sapar barysynda Túrkistan qalasyn túrki áleminiń mádenı-rýhanı ortalyǵy retinde damytý jónindegi bas jospardyń tujyrymdamasyn maquldaý týraly QR Prezıdentiniń Jarlyǵy jaryq kórdi.
Aıta ketsek, Qalanyń aýmaǵyn damytýdyń jalpy aýdan perspektıvasynda 500 myń adamdy quraıtyn halyqtyń sany úshin 25 000 gektar jer kólemi qajet etedi. Qalanyń jańa qurylysynyń sáýlet stıli jergilikti ulttyq salt-dástúrge súıenetin bolady. Josparlaý qurylymynyń negizgi qaǵıdaty qalanyń barlyq tusynan kórinýge tıis Qoja Ahmet ıAsaýı kesenesi bolyp tabylady.
