Túrkistan qalalyq emhanasy elimizdegi eń úzdik medıtsına mekemesi atandy
TÚRKІSTAN. QazAqparat – Túrkistandyq emhana elimizdegi eń úzdik emdeý mekemesi dep tanyldy. «MÁMS: Qazaqstan medıtsınasynyń transformatsııasy» atty forýmda atalǵan emhananyń bas dárigeri Janar Ospanovaǵa marapat tabystalyp, Alǵys hat tapsyryldy, dep habarlaıdy QazAqparat tilshisi.
Reıtıng barysynda patsıentterdiń pikiri, medıtsınalyq aqparattyq júıeni qoldanýy men dárigerdiń bir mólsherlemelik ortasha aılyq aqysynyń óńir ekonomıkasyndaǵy ortasha aılyq jalaqyǵa araqatynasy, medıtsınalyq qyzmetkerlerdiń eńbek jaǵdaılaryna qanaǵattanýshylyq deńgeıi men egov elektrondyq úkimet portaly arqyly dárigerge jazylý múmkindigi, qadaǵalaý keńesi men halyqaralyq akkredıtteý eskerildi.
Sondaı-aq, forým barysynda jalpy praktıkadaǵy dárigerler arasynda uıymdastyrylǵan «Eń úzdik otbasylyq dáriger men onyń komandasy» atty respýblıkalyq baıqaýdyń qorytyndysy shyǵaryldy. Baıqaýǵa «BankTsentrkredıt» AQ demeýshilik etip, halyqtyq daýys berýge 248 myń adam qatysqan bolatyn. Onyń qortyndysynda «Áleýmettik medıtsınalyq saqtandyrýdy túsindirý boıynsha úzdik otbasylyq densaýlyq ortalyǵy emhana» atalymynda Túrkistan qalalyq emhanasy alǵa ozdy.
Bas dáriger Janar Myqtybekqyzy basqaratyn emhana ujymyna 2,5 mln teńgeniń syıaqysy berildi. «Eń úzdik otbasylyq dáriger men onyń komandasy» baıqaýy boıynsha jeńimpaz retinde Túrkistan qalalyq emhanasynyń jalpy tájirıbelik dárigeri Álııa Dadahanova men onyń komandasy tanylyp, olarǵa 500 myń teńge kóleminde syıaqy tapsyryldy. Bul halyqtyń óz dárigerlerine degen ózinshe bir alǵys bildirýi jáne respýblıka deńgeıinde olardy moıyndaýynyń aıǵaǵy dese bolady.
Aıta keteıik, qalalyq emhana 94246 halyqqa medıtsınalyq qyzmet kórsetedi. Aýysymyna 1210 adam qabyldaýǵa arnalǵan medıtsınalyq mekeme zamanaýı úlgidegi medıtsınalyq qural-jabdyqtarmen jabdyqtalǵan. Búginde munda 30 ýchaskelik pedıatr men 47 jalpy tájirıbelik dáriger (JTD) turǵyndarǵa qyzmet kórsetedi. Dárigerlerdiń biliktilik joǵarylatýy jáne qaıta daıarlaýy júıeli túrde júrgizilip otyrady.
Bastapqy medıtsınalyq sanıtarlyq kómek kórsetý qyzmeti boıynsha qoljetimdiligin jaqsartý men kórsetiletin qyzmetterdiń sapasyn arttyrý maqsatynda jáne aımaqtyq dárigerlerdiń júktemesin azaıtý baǵytynda pedıatrııalyq aımaqtarda bala sanyn 900 den 500-ge, JTD aımaqtarda turǵyndar sanyn 2000-den 1700-ge tómendetilgen.
Jańa tehnologııalardy jetildirý jáne endirý boıynsha aýqymdy jumystar atqarylyp, emhanada halyqqa memlekettik qyzmetter, úıge shaqyrtý, dárigerge jazylý, bekitilgen halyq tirkelimi portalyna tirkelý qyzmetteri onlaın rejımde úkimettiń Egov.kz elektrondy saıty arqyly júrgiziledi. Engiziletin málimetter sapasyn arttyrý maqsatynda regıstratýralarǵa jeke kýálikterdegi elektrondy kiltti oqýǵa arnalǵan kartrıderler (card reader) alynǵan. Memlekettik qyzmetterdi elektrondy saıt arqyly tez júrgizý jáne KMIS baǵdarlamasyn sapaly endirý úshin termınal Standing termınaly arqyly elektrondy kezek uıymdastyrylǵan.
Sondaı-aq, elektrondyq júıege ótý maqsatynda KMIS baǵdarlamasymen jumys jasaý iske asyrylǵan. Búginde MÁMS júıesin halyqqa túsindirý men ony emhanaǵa engizý boıynsha júıeli jumystar júrgizilýde.
