Túrkistan iri ulttyq qolóner ortalyǵyna aınalady
TÚRKІSTAN. QazAqparat - QR Mádenıet jáne sport mınıstrligi janyndaǵy «Kazakh Tourism» UK AQ bastamasymen Túrkistan oblysy týrızm basqarmasynyń qoldaýymen qolóner ónimderi arqyly óńirdiń týrıstik áleýetin damytý boıynsha dóńgelek ústel ótkizildi, dep habarlaıdy QazAqparat Óńirlik kommýnıkatsııalar qyzmetine silteme jasap.
Іs-sharany Túrkistan oblystyq týrızm basqarmasynyń basshysy Gúlmıra Ahberdıeva ashty. Basqosýǵa «Kazakh Tourism» UK AQ týrıstik ónimderdi damytý departamentiniń dırektory Danıel Serjanuly, «Atameken» UKP Túrkistan oblystyq fılıaly dırektorynyń orynbasary Oljas Janseıtov, «Aigul line» brendiniń negizin qalaýshy, Qazaq-Oner qolónershiler ortalyǵynyń basshysy Aıgúl Janserikova, BUUDB ókilderi jáne jergilikti qolónershiler qatysty.
Gúlmıra Ahberdıeva qolóner jáne kádesyı ónimderi arqyly aýmaqtyq brendıng máselesin qozǵady. Ol óńirge keletin týrısterdiń qazaq halqynyń tarıhy, dástúri men mádenıetiniń bir bóligin ózimen birge alyp ketkisi keletindigin atap ótti.
Qazirgi kezeńde Qazaqstanda qolónerdiń róli ulttyq mádenıettegi kóp ǵasyrlyq qolóner tarıhyna qaramastan, kóleńkede qalyp otyr. Kóbinese, qolóner sheberleri óz kúsh-jigerin óndiristik aspektilerge ǵana jumsap keledi.
Ejelden qolóner ortalyǵy bolyp sanalatyn tarıhı shahardaǵy ulttyq qolónerdi damytý, Túrkistan qalasyn álemdik deńgeıdegi iri ulttyq qolóner ortalyǵyna aınaldyrý baǵytynda júıeli jumystar júrýde.
Osy oraıda, «Kazakh Tourism» UK» AQ-men týrızm sýbektisi retinde qolónershilikti damytýdy keshendi zertteý jobasy aıasynda elimizde ónimdi ótkizý, ilgeriletý, ótkizý alańdaryn qurý boıynsha máselelerin retke keltirý jumystary júrgizilýde.
Sonymen qatar, shara barysynda «Aigul line» brendiniń negizin qalaýshy Aıgúl Janserikova «Qazaq-Oner» qolónershiler ortalyǵynyń jumys tájirıbesimen bólisip, ulttyq buıymdardyń óndirisimen qatar, ony satýdyń jańa baǵyttaryn tabýdy usyndy.
