Túrkistan: Investor 13 tonna qurǵaq túıe sútin eksporttady
TÚRKІSTAN. QazAqparat - Túrkistan oblysynda túıe sharýashylyǵy ónimderiniń eksporttyq áleýeti artýda, dep habarlaıdy QazAqparat.
2018 jyly Qytaı Halyq Respýblıkasy men Qazaqstan Respýblıkasynyń yntymaqtastyq memorandým sheńberinde ındýstrıaldy-ınnovatsııalyq damý baǵdarlamasy aıasynda quny 6,9 mlrd teńgeni quraıtyn «GOLDEN CAMEL GROUP LTD» JShS-niń «Túıe sútin qaıta óńdeý zaýyty» ınvestıtsııalyq jobasy júzege asyrylǵan bolatyn.
Kásiporynnyń táýliktik qýattylyǵy 100 tonna túıe sútin qaıta óńdeý.
Qazirgi tańda kásiporyn 5 sút qabyldaý beketteri (Sozaq Ordabasy, Otyrar aýdandary men Túrkistan qalasy) arqyly 20 sharýa qojalyqtarymen kelisim shartqa otyryp, táýligine 5 tonna túıe súti qabyldaýda. Túıe sútin qabyldaý baǵasy 1000 teńgeni quraıdy.
Bul túıe sharýashylyqtarymen jáne osy salamen aınalysýǵa nıeti bar aýyl turǵyndarynyń úlken qyzyǵýshylyǵyn týdyryp otyr.
Osy maqsatta, oblys ákimi Ómirzaq Shókeevtiń tikeleı bastamasymen «Túrkistan oblysynda túıe sharýashylyǵyn damytýdyń 2020-2022 jyldarǵa arnalǵan keshendi is-shara jospary» qabyldandy. Nátıjesinde bıylǵy jyldyń ózinde Arys, Kentaý qalalary men Otyrar, Ordabasy, Sozaq, Shardara aýdandarynda qosymsha 3 962 analyq bas túıe satyp alynyp, súttiń kólemi 14 250 tonnaǵa, ıaǵnı kásiporynnyń qýattylyǵyn 15 %-ǵa ulǵaıtýǵa qol jetkiziledi.
«Qarapaıym zattar ekonomıkasy» baǵdarlamasy aıasynda túıe sharýashylyǵyn keńeıtý jobasynda jyldyq 6%-ben nesıelendirý joldary qarastyrylǵan. Jobanyń ózin-ózi aqtaý ýaqyty 8-9 aı kólemdi quraıdy.
Búgingi kúni túıe sharýashylyǵyn damytýǵa nıettengen 80 AShTÓ-i anyqtaldy, satyp alynatyn analyq túıe sany 3070 basty quraıdy. Onyń ishinde qarjy uıymynan quny - 1 mlrd 115 mln teńge quraıtyn 3 joba maquldanyp otyr.
Sondaı-aq, kásiporyn «1000 basqa arnalǵan saýyndy túıe keshenin salý» jobasyn iske asyrýdy qolǵa aldy. Jobany iske asyrýǵa Kentaý qalasy jáne Báıdibek, Sozaq, Otyrar aýdandarynan jer telimderi qarastyrylýda.
Memleket basshysy Qasym-Jomart Toqaevtyń 2019 jyldyń 11 qyrkúıeginde Qytaı eline resmı saparynda eki el arasynda eksporttalatyn sút ónimderine jáne jún shıkizatyna qoıylatyn veterınarııalyq-sanıtarııalyq talaptar týraly hattamaǵa qol qoıylyp, aýyl sharýashylyǵy ónimderiniń eksportqa baǵyttalǵan tizilimi keńeıtilip otyr.
Jýyrda ǵana «GOLDEN CAMEL GROUP LTD» JShS-niń Qytaı Halyq Respýblıkasyna túıe sútinen daıyndalǵan alǵashqy 13 tonna untaq ónimi eksportqa shyǵaryldy.
Jalpy óńirde túıe sharýashylyǵyn damytý boıynsha is-sharalar jospary nátıjeli júzege asyrylýda.
