Túrkistan halyqaralyq deńgeıdegi qalaǵa aınalyp keledi - Ómirzaq Shókeev
TÚRKІSTAN. QazAqparat – Túrkistan oblystyq máslıhatynyń kezekti sessııasyna aımaq basshysy Ómirzaq Shókeev qatysyp, Túrkistan qalasynda salynyp jatqan jańa nysandar aldaǵy ýaqytta el ıgiline beriletinin atap ótti , dep habarlaıdy QazAqparat tilshisi.
«Elbasy Nursultan Nazarbaevtyń tapsyrmasy boıynsha Túrkistan halyqaralyq deńgeıdegi qalaǵa aınalyp kele jatyr. Mundaǵy qurylys qarqyny báseńdemeıdi. Memleket basshysy Qasym-Jomar Toqaevtyń tapsyrmalary Túrkistandy damytýǵa tyń serpin beredi. Sondyqtan qasıetti qalany damytý jumystary odan ary jandana túsedi»,- dedi Ómirzaq Shókeev.
Máslıhat otyrysynda aımaq basshysy sondaı-aq, óńirde óte úlken ári aýqymdy jumystar atqarylyp jatqanyn jetkizdi. Jergilikti bılik ókilderine júktelgen jaýapty tapsyrmalardyń birtindep oryndalyp jatqanyna toqtaldy.
«Tapsyrmalardyń ishinde árıne Túrkistan qalasyn oblys ortalyǵy retinde qalyptastyrý bolatyn. Barlyǵymyzdyń maqsatymyz - oblystyń áleýmettik-ekonomıkalyq jaǵymen qatar, óńirdiń rýhanı-mádenı salasyn birge damytý boldy. Óńirde atqarylyp jatqan jumystardyń nátıjesin ózderińiz kórip otyrsyzdar. Qalada ákimshilik-iskerlik ortalyǵy, mádenı-rýhanı ortalyq jáne Q.A.ıAsaýı kesenesiniń aınalysynda qurylystar júrgizilip jatyr. Kóptegen nysandardyń qurylys barysy qazirdiń ózinde qalaǵa sáýlettik naqyshymen erekshe reń berip tur», - dedi oblys ákimi.
Oblystyq máslıhat barsynda sonymen qatar 2021-2023 jyldarǵa arnalǵan oblys bıýdjeti men oblys ákimdigi janyndaǵy sybaılas jemqorlyqqa qarsy is-qımyl máseleleri jónindegi komıssııanyń derbes quramy bekitildi. Máslıhattyń turaqty komıssııalarynyń aǵymdaǵy jylǵy qyzmeti jónindegi esepteri men keler jylǵa arnalǵan jumys jospary sekildi barlyǵy 19 másele qaralyp, onyń nátıjesi boıynsha tıisti sheshimder qabyldandy.
