Túrkistan halyqaralyq áýejaıy jaramdylyq sertıfıkatyn aldy
TÚRKІSTAN. QazAqparat - Túrkistan halyqaralyq áýejaıy alǵash ret áýeaılaqtyń jaramdylyq sertıfıkatyn aldy, dep habarlaıdy QazAqparat tilshisi.
QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń málimetinshe, atalǵan tekserý kezinde áýejaıdyń tehnıkalyq bazasy men jabdyqty sertıfıkattalýy, áýeaılaq basshylyǵynyń jáne barlyq qyzmetter men jabdyqtardyń qujattamasy zerttelgen.
«Sondaı-aq, sertıfıkattyq tekserý kezinde áýeaılaqtyń fızıkalyq sıpattamalary men áýeaılaq jasandy jabyndarynyń jaǵdaıy, belgilenýi, kedergilerdi shekteý jáne esepke alý men ushýdy ornıtologııalyq qamtamasyz etý, elektrmen jabdyqtaý men ushýdy elektrli jaryqpen tehnıkalyq qamtamasyz etý jaǵy qaralǵan.
Avıaotynmen qamtamasyz etý men ushýdy avarııalyq-qutqarýmen qamtamasyz etýge, áýeaılaqqa qyzmet kórsetý jáne kútip-ustaýǵa, áýeaılaqtaǵy qaýipsizdikti qamtamasyz etý men ushý qaýipsizdigin basqarý júıesine mán berilgen. Áýe kemelerine jerdegi qyzmet kórsetý men jolaýshylar men bagajǵa qyzmet kórsetý, áýe kemelerin muzdan tazartý men avıatsııalyq qaýipsizdik jáne ushý qaýipsizdigin medıtsınalyq qamtamasyz etý jaǵy tekserilgen. Sertıfıkattyq tekserý aıaqtalǵannan keıin Qazaqstannyń avıatsııalyq ákimshiligi áýeaılaqtyń jaramdylyǵy sertıfıkatyn tapsyrdy.
Osylaısha Túrkistan áýejaıy ishki jáne halyqaralyq reısterdi, sonyń ishinde júk tasymaldaý reısterin qabyldaý múmkindigine ıe boldy», - delingen aqparatta.
Bul QR IIDM Azamattyq avıatsııa komıtetiniń, Qazaqstannyń avıatsııalyq ákimshiliginiń, Túrkistan oblysy ákimdiginiń jáne «YDA» túrik kompanııasynyń paıdalanýǵa berýge daıyndyq jumysynyń 9 aı ishindegi birlesken jumysynyń nátıjesi bolmaq.
Aıta keteıik, Túrkistan halyqaralyq áýejaıy jańadan jobalanǵan, salynǵan jáne paıdalanýǵa berilgen eldegi alǵashqy áýe aılaǵy sanalady.
1 jeltoqsanda «Fly Arystan» áýe kompanııasynyń ınaýgýratsııalyq reısin iske qosý josparlanýda. Reıster kún saıyn Nur-Sultan jáne Almaty qalalarynan Túrkistanǵa oryndalatyn bolady. Sondaı-aq, «Qazaq Air» áýe kompanııasy óz áýe kemelerin Túrkistan qalasynyń áýejaıyna ornalastyrýdy josparlap otyr.
