«Túrkistan - er túriktiń besigi ǵoı...» atty ádebı baıqaý bastaldy

TÚRKІSTAN. QazAqparat - Ońtústikte «Túrkistan - er túriktiń besigi ǵoı...» atty respýblıkalyq ádebı baıqaý bastaldy, dep habarlaıdy QazAqparat óńirlik kommýnıkatsııalar qyzmetine silteme jasap.

Baıqaýdy «Rýhanı jańǵyrý» baǵdarlamasy aıasynda Túrkistan oblystyq ishki saıasat basqarmasy men «Rýhanı jańǵyrý» jobalyq keńsesi uıymdastyryp otyr. Konkýrs tarıhy tereńge tamyr tartqan, Elbasy Jarlyǵymen oblys ortalyǵyna aınalǵan Túrkistannyń mártebesin kóterý maqsatynda qolǵa alynǵan.

Uly Turannyń ortalyǵy - Túrkistandy nasıhattaýǵa arnalǵan ádebı dodaǵa respýblıkamyzdyń kez kelgen óńirinen qalamgerler qatysa alady. Baıqaý proza jáne poezııa janrlary boıynsha ótedi. Oǵan shyǵarmalardy 13 naýryz ben 7 maýsym aralyǵynda joldaýǵa bolady.

Ár janr boıynsha júldeler bólek anyqtalyp, júldegerler qarjylaı syılyqtarmen marapattalady. Baıqaýǵa túsken shyǵarmalardy saraptaıtyn ádil qazy quramynda aqyn-jazýshylar, ǵalymdar, synshylar, kitaphanashylar, óner jáne mádenıet qaıratkerleri men qoǵam qaıratkerleri bar. Júldeger atanǵan shyǵarma avtorlary Elbasynyń Túrkistan qalasyn oblys ortalyǵyna aınaldyrý jónindegi Jarlyǵynyń bir jyldyǵyna oraı, ıaǵnı, 19 maýsymda Túrkistan qalasynda ótetin marapattaý rásimine shaqyrylady. Jeńimpaz ben júldegerler qomaqty qarjylaı syılyqtarmen marapattalady.