Túrkistan basshysy ákimdik ǵımaratynyń satylýyna qatysty túsinik berdi
TÚRKІSTAN. QazAqparat - Túrkistan qalasynyń ákimi Rashıd Aıýpov ákimdik ǵımaratynyń satylýyna qatysty tikeleı efırge shyǵyp, málimdeme jasady.
Birqatar buqaralyq aqparat quralynda Túrkistan ákimdiginiń tórtqabatty ǵımaraty aýktsıonda 313 mln teńgege satylǵany, nysanǵa birshama ýaqyt buryn ǵana 257 mln teńgege jóndeý júrgizilgeni habarlandy. Ǵımarat quny jasandy túrde 30 paıyzǵa arzandatyldy degen kúdikpen prokýratýra sotqa júgingen. Sot satý-satyp alý kelisimshartyn zańsyz dep tapty.
«Birinshiden, qala ákimdiginiń burynǵy ǵımaratyna qatysty rasynda da qalada sammıt kezinde qonaq úılerdi kóbeıtý máselesi týyndaǵan. Osy boıynsha janyndaǵy «Evrazııa« qonaq úıine jáne basqa jerlerge de usynǵan bolatynbyz. «Túrkistan« áleýmettik kásipkerlik korporatsııasy arqyly jasaý da qarastyryldy. Biraq, sheshim ózgerip, aýktsıon arqyly satylatyn bolyp sheshildi. Ǵımarattyń baǵasyn shyǵarý ákimdiktiń quqyǵynda emes, arnaıy mekemeniń quzyrynda. Sol boıynsha ǵımarattyń baǵasyn shyǵarǵan bolatyn», - dedi qala ákimi.
R.Aıýpov 1970 jyly salynǵan ákimdik ǵımaratyna (jalpy aýmaǵy 2554,7 sharshy metr) 257 mln teńgege jóndeý júrgizilgenin rastady. Biraq jóndeý úsh jyl buryn jasalǵan.
«Ǵımaratqa 2018 jyly 257 mln teńge kóleminde jóndeý júrgizilgen, sol baǵa boıynsha qosylǵan jáne de ol QR Qarjy mınıstrligine qarasty veb portalǵa engizilgen edi. Ol jerdegi satyp alýshyny da, satyp alýǵa qatysýshyny da jáne onyń baǵasyn qadaǵalaıtyn ákimdik emes. Jalǵyz sol portal arqyly naryqtyq júıemen jasalady.
ıAǵnı, eń birinshi aǵylshyn júıesimen baǵanyń kóterilýi boıynsha oǵan birneshe adam tirkeldi. Biraq, oǵan eshqandaı saýda bolmaǵan. Ekinshi aýktsıon baǵany tómendetý boıynsha ótti.
Aýktsıon bastalǵan kezde biz portalda kimniń tirkelgenin kóre almaımyz. Sol kisi tómendetý knopkasyn basý arqyly satyp aldy.
Biraq, qosymsha aıtyp ketý kerek, usynylǵan baǵadan bir tıyn da tómen túsken joq. Sondyqtan prokýratýranyń aıtqanyna kelispeımiz. Sol sebepti birinshi kelisimshartty buzý týraly sheshim shyqqanymen, biz ary qaraı apellıatsııalyq sotqa shaǵym jazdyq. Biz ary qaraı da sottasatyn bolamyz. Óıtkeni, bir qyzyǵýshy adam almady dep satyp alýshynyń artynan qýdalaýdyń qajeti joq dep oılaımyn», - dedi Túrkistan basshysy.
Aıta ketsek, Rashıd Aıýpov buǵan deıingi suhbattarynda Túrkistan qalasy ákimdiginiń qazirgi ǵımaraty mýzeıdiń ǵımaraty emes, qurylǵan kezden bastap ákimdikke tıesili bolǵanyn aıtqan edi. Mýzeı ǵımarattyń ishinde biraz ýaqyt ornalasqanymen, bul ákimdik ǵımaraty bolyp kelgenin, sondyqtan da osynda kóshý sheshimi qabyldanǵan. «Bólimderdiń jaqsy otyrǵany kerek pe, álde bizge Túrkistannyń damyǵany kerek pe?!... Qazir qalalyq bólimder ǵana emes, basqa da kóptegen organdar óz ǵımarattarynda otyrǵan joq», - degen bolatyn ol.
Túrkistan oblysy ákiminiń 2019 jylǵy hattamalyq tapsyrmasyna sáıkes, Túrkistan qalasyna keletin týrısterge qolaıly jaǵdaı jasaý úshin ǵımaratty zamanaýı qonaqúı retinde paıdalaný júktelgen. Osy maqsatta, ákimdik ǵımaraty elektrondyq saýda-sattyqqa qoıyldy.
