Túrkistan: Aýyl kásipkerlerine tómen paıyzben 6,8 mlrd teńge beriledi
NUR-SULTAN. QazAqparat - Túrkistan oblysynda aýyl kásipkerleri jeńildikpen qarjylandyrylady, dep habarlaıdy oblystyq ákimdiktiń baspasóz qyzmeti.
«Aýyl sharýashylyǵyn qarjylaı qoldaý qory» AQ Túrkistan fılıaly «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda aýyldyq jobalardy qarjylandyrýdy bastady. 2019 jylǵy 1 qańtardaǵy jaǵdaı boıynsha Túrkistan fılıaly osy baǵdarlama boıynsha 601 mln. teńge somasyna 41 nesıe berdi. Bul týraly Óńirlik kommýnıkatsııalar qyzmetinde ótken brıfıngte «Aýyl sharýashylyǵyn qarjylaı qoldaý qory» AQ Túrkistan fılıaly dırektorynyń mindetin atqarýshysy Talǵat Janısenov málimdedi.
Sondaı-aq, ótken jyly atalǵan baǵdarlama boıynsha Túrkistan oblysynda 3 mlrd teńgege 700-den astam nesıe berilgen. Qor 2013 jyldan beri aýyl kásipkerlerin qarjylandyrýdy kózdeıtin birqatar memlekettik baǵdarlamalardyń qarjylyq operatory bolyp keledi. 2017 jyldan beri Qor «Eńbek» Nátıjeli jumyspen qamtýdy jáne jappaı kásipkerlikti damytý baǵdarlamasynyń ekinshi baǵytyn júzege asyrady.
Qor aýyldyq jobalardy túrli baǵyttar boıynsha qarjylandyrady. Mysaly, «Igilik» baǵdarlamasy boıynsha iri qara mal, usaq mal, túıeler, qustar, bal aralaryn satyp alý qarastyrylǵan bolsa, «Kásipker» jobasy - aýyldaǵy barlyq bıznes túrlerin damytýǵa baǵyttalǵan.
«Nátıjeli jumyspen qamtýdy jáne jappaı kásipkerlikti damytý» baǵdarlamasy boıynsha nesıeler jyldyq 6% syıaqy stavkasy boıynsha beriledi. Nesıe ónimine baılanysty merzim, somasy, jeńildik kezeńiniń merzimi ózgeredi. Sondaı-aq, nesıeleý kezinde agrarlyq salanyń ereksheligi, aýyl sharýashylyǵy jumystarynyń maýsymdylyǵy eskeriledi.
«Bıyl Túrkistan fılıaly tarapynan 6,8 mlrd. teńge zaem berý josparlanǵan. Onyń ishinde «Nátıjeli jumyspen qamtý» baǵdarlamasy aıasynda - 3,3 mlrd. teńge qarastyrylǵan. Nátıjeli jumyspen qamtý qarajatyn qaıta ınvestıtsııalaý arqyly 725,3 mln. teńge, qordyń jeke qarajatynan - 2,7 mlrd. tenge bólý kózdelip otyr», - Talǵat Janısenov.
Qordyń bıylǵy jylǵa qarjylandyrýdyń negizgi baǵyttary: «Nátıjeli jumyspen qamtýdy jáne jappaı kásipkerlikti damytýdyń» memlekettik baǵdarlamasy aıasynda «Igilik» jáne «Kásipker» nesıe ónimderi; etti mal sharýashylyǵyn damytýdyń salalyq baǵdarlamasy aıasynda «Sybaǵa» nesıelik baǵdarlamasy; taýarly sút fermalaryn damytýǵa baǵyttalǵan «Yrys» baǵdarlamasy boıynsha qarjylandyrýdy jalǵastyrý josparlanýda.
Qazirgi ýaqytta Qordyń Túrkistan fılıalynda «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda ótinimderdi qabyldaý bastaldy. Aýyl turǵyndary jeńildetilgen nesıe alý úshin aýdandyq Jumyspen qamtý ortalyǵyna baryp, kásipkerlik negizderine oqytylýy tıis. Sertıfıkat alǵan soń, jeke kásipker retinde memlekettik tirkeýden ótip, nesıeleýge joldama alady. Odan ári bastapqy qujattar toptamasyn jáne bıznes-josparyn Qordyń fılıalyna tapsyrady nemese ótinimdi kazagro.kz portaly arqyly onlaın jiberýge bolady.
Bastapqy qujattardy qaraýdyń birinshi kezeńinen ótkennen keıin sheshim qabyldaý úshin Qor qyzmetkerleri qalǵan qajetti qujattardy suratady. Tolyq qujattar paketin usynǵannan keıin 15 jumys kún ishinde nesıe komıteti qarjylandyrý nemese bas tartý týraly sheshim shyǵarady.
Barlyq suraqtardy 8 800 080 3505 tikeleı jeli arqyly qoıýǵa bolady nemese fılıaldaǵy menedjerlerden keńes ala alýǵa bolady.
