Túrkistan aýmaǵyn kógaldandyrý jumystary qarqyndy júrgizilýde
TÚRKІSTAN. QazAqparat - Túrkistan qalasynyń aýmaǵyn kógaldandyrý jumystary qarqyndy túrde júrgizilýde. Aǵash kóshetteri otyrǵyzylatyn jerler aýdan, qala ákimdikteri men basqarmalarǵa 32 sektorǵa bólinip berilgen. Sonyń ishindegi 16-sektor Keles aýdanyna tıesili.
Osy iske jaýapty aýdan ákiminiń orynbasary Almas Seksenbaevtyń sózinshe, kelestikter 8 200 aǵash otyrǵyzyp, jospardaǵy jumystyń 70 paıyzyn oryndap úlgergen.
«Túrkistan aımaǵyn kógaldandyryp, abattandyrýǵa aýdannan 8 tehnıka men 200-ge jýyq azamat atsalysýǵa keldi. Qazir ózimizge bekitilgen sektor aýmaǵyndaǵy barlyq kóshelerdi tazalap, qunarly topyraqty tóseýdemiz. Qatty jerdi jumsartýda tehnıkanyń kúshin de paıdalanyp jatyrmyz. Kóshetterdi sýarý maqsatynda tamshylatyp sýarý ádisi qoldanylady. Ol úshin tıisti qural-jabdyqtar jetkizilip, arnaıy uńǵymalar qazyldy», – dedi A.Seksenbaev.
Budan bólek, Keles aýdanyna qosymsha transformator ornatý jumysy da júktelgen. Jaqyn kúnderi jumysty tolyǵymen aıaqtaý josparlanýda.
