Túrkistan áýejaıyna barar jol boıyna qara órik otyrǵyzyldy
TÚRKІSTAN. QazAqparat - Túrkistan áýejaıyna barar joldyń boıy baý-baqshaǵa aınalyp, 400 gektar aýmaqqa 200 myń túp qara órik kóshetteri otyrǵyzyldy. Zamanaýı baý-baqsha ızraıldik ozyq tehnologııasy boıynsha tamshylatyp sýarý júıesimen jabdyqtalǵan, dep habarlaıdy QazAqparat Oblys ákiminiń baspasóz qyzmetine silteme jasap.
Oblys ákimi Ómirzaq Shókeevtiń tapsyrmasymen qolǵa alynǵan jobanyń nátıjesinde úsh jyldan soń 1 gektardan 20 tonnaǵa deıin ónim alýǵa bolady. Munda jergilikti aýa-raıyna qolaıly qara óriktiń Black Splendor, Black Diamond jáne Angeleno sekildi eń shyryndy suryptary egildi.
Óńir basshysy jobanyń júzege asyrylýyn pysyqtady. Bul aýmaqqa qosymsha qaýyn egýge bolatynyn aıtyp, osyǵan oraı arnaıy mamandardy tartýdy tapsyrdy. Kentaý qalasyna qarasty Shaǵa aýyldyq okrýginiń aýmaǵyna jaıǵasqan jaıqalǵan baý-baqsha «Túrkistan» EKK» AQ men «Dala – Fruit.kz» JShS birlesken kúshimen iske asyrylýda.
Qaladaǵy qurylys alańdaryn aralaǵan oblys ákimi jańadan salynyp jatqan ǵımarattarda bolyp, qurylysshylarmen kezdesti. Mádenı-rýhanı ortalyqtyń qaıtalanbas úlgisin saqtaýdy tapsyrǵan Ó. Shókeev qurylysty belgilengen merzimge sáıkes tapsyrýdy júktedi. Eń aldymen sapaǵa basa mán berýdi mindettedi.
