Túrkistan áýejaıyna alǵashqy ushaq kelip qondy
NÝR-SÝLTAN. QazAqparat – QR Tuńǵysh Prezıdenti kúnine oraı otandyq loýkoster Fly Arystan kompanııasynyń Túrkistan men Nur-Sultan qalalary arasyndaǵy turaqty reısi ashyldy, dep habarlaıdy QazAqparat.
QR Indýstrııa jáne ınfraqurylymdyq damý mınıstrliginiń Azamattyq avıatsııa komıtetiniń habarlaýynsha, Nur-Sultan-Túrkistan reısine 168 bılet (93%), Túrkistan - Nur-Sultan reısine 161 bılet satylǵan.
«Birinshi kezeńde Túrkistan qalasynyń jańa halyqaralyq áýejaıynan «Fly Arystan», «Qazaq Air» jáne «SCAT» áýe kompanııalary Nur-Sultan, Almaty qalalaryna kúndelikti reıster oryndaıdy jáne túrki áleminiń rýhanı ortalyǵy retinde Túrkistan Qazaqstannyń basqa oblys ortalyqtarmen baılanysady.
Halyqaralyq baǵyttardyń ishinde eń aldymen Ystanbul, Dýbaıǵa reıster ashý josparlanyp otyr. Bolashaqta basqa qalalarǵa, onyń ishinde Máskeý, Baký, Samarqand jáne basqa qalalarǵa reıster ashylatyn bolady», - dep habarlady Azamattyq avıatsııa komıteti.
Sonymen birge Túrkistan áýejaıy shetel áýe kompanııalarynyń ushýy úshin «ashyq aspan» rejıminde jumys isteıdi. Bul áýejaıdyń ushý geografııasyn keńeıtýge jáne sheteldik týrısterdi tartýǵa yqpal etedi.
