Turkistan Arena, Kongress Holl, Etno aýyl: jańa nysandar bıyl paıdalanýǵa beriledi
TÚRKІSTAN. QazAqparat - Túrkistan qalasynyń ákimi Rashıd Aıýpov BAQ qyzmetkerlerine arnaıy press-týr aıasynda oblys ortalyǵyndaǵy jańa nysandardy tanystyrdy, dep habarlaıdy QazAqparat óńirlik kommýnıkatsııalar qyzmetine silteme jasap.
Aldymen arnaıy top ákimshilik-iskerlik ortalyǵyndaǵy «Kongress Holl» kontsert zalymen tanysty. Ǵımarattyń aýmaǵy - 6438 sharshy metr. Saraıdyń birinshi qabatynda 1000 oryndyq kórermen zaly, ákimshilik úı-jaılar jáne balalar oıyn bólmesi bar. Ekinshi qabatta jınalys bólmesi men ákimshilik úı, 400 oryndyq zal ornalasqan.
Keıin BAQ qyzmetkerleri 7000 kórermenge laıyqtalǵan «Turkistan Arena» stadıonyna aıaldady. Stadıon ǵımaratynda akrobatıka, boks, aýyr atletıkaǵa arnalǵan zaldar bar. Sonymen qatar, joǵary bilikti sportshylardy daıyndaýǵa arnalǵan tolyqqandy kúndelikti jattyǵýlar ótkizýge jaǵdaılar qarastyrylǵan. Týr aıasynda top Oqýshylar saraıynyń qurylysymen de tanysty. Nysan aýmaǵy 9250 sharshy metr. Ǵımarat 1200 oqýshyǵa arnalǵan. Ondaǵy teatr zaly 400 adamdy, al konferents-zal 80 adamdy qabyldaı alady.
Túrkistan qalasynda jańa nysannyń biri «Otyrar» yqshamaýdanyndaǵy basseıni bar sport kesheni. Jalpy aýmaǵy 3,82 gektardy quraıtyn nysan 1300-den astam adamdy qabyldaı alady. Sport kesheninde keńse bólmeleri, shaǵyn fýtbol, basketbol, voleıbol, gandbol sııaqty sporttyq is-sharalarǵa arnalǵan jattyǵý zaly, sondaı-aq sport, ıoga zaly, ústel tennıs zaly jáne olımpıadalyq parametrleri saı sport basseıni bar.
Press-týr aıasynda qalada týrısterge arnalǵan «Qabyldaý ortalyǵy» tanystyryldy. Kelýshilerdiń nazaryn aýdaratyn ondaǵy qundy jádigerler men tarıhı kitaptar. ıAǵnı, rýhanı shaharǵa kelgen qonaqtar Qabyldaý ortalyǵyna kelip, Túrkistan jaıly tolyq málimet ala alady. Onda tamaqtaný oryndary, elektrondy karta, úsh túlde málimet beretin aýdıogıd bar. Qonaqtar Qazaq handyǵy ınteraktıvti zalynda Kenesary hannyń qylyshynyń túpnusqasy jáne basqa da jaýyngerlik kıimderdi kóre alady. Sondaı-aq, onda Túrkistan oblysy aýmaǵynyń tarıhı jerleri ınteraktıvti taqta arqyly kórsetiledi. Sonymen qatar, BAQ qyzmetkerleri «Áziret-Sultan» tarıhı-mádenı qoryq mýzeıi aımaǵyndaǵy «Etno aýyl» jobasymen tanysty. Etno aýylda - qolóner sheberhanasy, shyǵys bazary, dástúrli taǵamdar aımaǵy, ulttyq oıyndar alańy, merekelik qoıylymdar alańy, atqa arnalǵan alań ornalasqan.
