«Túrkistan» anımatsııalyq fılminiń tusaýy kesildi
TÚRKІSTAN. QazAqparat - Túrkistan oblysynda «Túrkistan» anımatsııalyq fılminiń tusaýkeser rásimi ótti. Jańadan jaryqqa shyqqan týyndy kórermenge «Jas Túrkistan-2019» respýblıkalyq balalar shyǵarmashylyǵy marafony aıasynda kórsetildi, dep habarlaıdy QazAqparat tilshisi.
Anımatsııalyq fılmniń jelisi Túrkistan qalasynda órbıdi jáne balalarǵa jeńil tilde jetkiziledi. Onda Qalqanqulaq esimdi balanyń saıahaty arqyly Qoja Ahmet ıAsaýı kesenesiniń qalaı jáne qashan soǵylǵany týraly aıtylady. Basty keıipker Túrkistanǵa baryp, Táýke hanmen kezdesedi. «Jeti jarǵynyń» tarıhymen tanysady. Balalyq erlik jasaıdy. Jalpy, oqıǵanyń jelisi jas kórermenderge qyzyqty etip baıandalǵan.
«Biz bul mýltfılmdi 4 aıdyń kóleminde daıyndap shyǵardyq. Endi barlyq aýdan-qalalarda balalarǵa tegin kórsetemiz. Sondaı-aq, birneshe arnalarda kórsetý josparymyzda bar. Kórermender bul týyndyny sondaı-aq áleýmettik jeliler arqyly da kóre alady»,- deıdi «Saq» kınostýdııasynyń dırektory Nurıddın Pátteev.
Aıta keteıik, «Bolashaqqa baǵdar: rýhanı jańǵyrý» baǵdarlamasy boıynsha anımatsııalyq fılm túsirýden Túrkistan oblysy respýblıkada aldyńǵy orynǵa shyqty. «Saq» kınostýdııasy oblys ákimdiginiń tarsyrysymen jasóspirimderge, balaqaılarǵa el tarıhyn tanýǵa, otanshyl bolyp ósýdi dáripteıtin anımatsııalyq jáne kórkem fılmder túsirdi. Olardyń qatarynda «Otyrardy qorǵaý», «Jetigenniń jeti syry», «Kıeli Qazyǵurt», «Oqsyz oqıǵasy» syndy birneshe anımatsııalyq fılmdi jaryqqa shyǵardy.
