Túrkistan-Almaty reısine 30 jolaýshy keshigip qaldy: áýe kompanııasynyń ókilderi túsinikteme berdi
ALMATY. QazAqparat - Túrkistan-Almaty reısi 30 jolaýshyny tastap ketti. Áýe kompanııasynyń ókilderi qalyptasqan jaǵdaıǵa qatysty túsinikteme berdi, dep habarlaıdy QazAqparat tilshisi.
Ushaq jolaýshylary áleýmettik jelide áýe kompanııasynyń qyzmetine shaǵymdandy.
FlyArystan baspasóz qyzmeti 12 sáýirde Túrkistan-Almaty baǵytymen ushyp shyqqan KC7162 reısiniń 30-ǵa jýyq jolaýshysy keshigip, reıske úlgermeı qalǵanyn aıtty.
«Bul reıstiń ushýy saǵat 12:40-qa josparlanǵan. Tasymaldaý erejelerine sáıkes, osy reıske tirkelý ushýǵa 40 mınýt qalǵanda, ıaǵnı saǵat 12:00-de jabylǵan, ol tirkeý júıesinde, sondaı-aq Túrkistan halyqaralyq áýejaıynyń beınebaqylaý kameralarynda jazyldy.
146 jolaýshysy bar ushaq keste boıynsha ushyp ketti. Al reıske keshigip kelgen jolaýshylarǵa áýe kompanııasynyń qyzmetkerleri barlyq erejelerdi túsindirdi. Sonymen qatar, klıentterdi qoldaý qyzmetine shaǵym túsirýge quqyly ekenderin aıtty.
«Alaıda jolaýshylar FlyArystan qyzmetkerlerin tyńdaýdan bas tartyp, ashýǵa boı aldyryp, áýe kompanııasynyń múlkine qasaqana zııan keltirdi», - dep habarlady kompanııadan.
