Túrkistan: áleýmettik ıdeıalar men jobalar jármeńkesiniń onlaın baıqaýy jarııalandy

TÚRKІSTAN. QazAqparat - Túrkistan oblysynyń úkimettik emes uıymdary arasynda jyl saıyn turaqty túrde uıymdastyrylatyn eń úzdik áleýmettik ıdeıalar men jobalar jármeńkesi bıylǵy jyly onlaın rejıminde ótetin boldy, dep habarlaıdy QazAqparat óńir basshysynyń baspasóz qyzmetine silteme jasap.

Bul jaıly Túrkistan oblysy Óńirlik kommýnıkatsııalar qyzmetinde ótken brıfıngte Túrkistan oblysy Azamattyq Alıansy zańdy tulǵalar qaýymdastyǵy qoǵamdyq birlestiginiń prezıdenti Sháripbek Jamalbek pen «Bereke» qoǵamdyq birlestiginiń koordınatory Gúlsim Andabaeva málim etti.
Áleýmettik ıdeıalar men jobalar jármeńkesi «Túrkistan oblysy aýdandyq ÚEU-nyń damýyna qoldaý kórsetý» jobasy sheńberinde júzege asýda. Atalǵan joba Túrkistan oblysy qoǵamdyq damý basqarmasynyń tapsyrysymen «Bereke» qoǵamdyq birlestigi men «Túrkistan oblysy Azamattyq Alıans» zańdy tulǵalar qaýymdastyǵynyń uıymdastyrýymen ótkeli otyr.

Sháripbek Jamalbek onlaın baıqaýdyń erejesimen tanystyryp, kórsetken qoldaýy úshin Túrkistan oblysy qoǵamdyq damý basqarmasyna alǵysyn bildirdi.
Atap óteıik, baıqaýdyń basty maqsaty - úkimettik emes uıymdardyń azamattyq bastamalaryna qoldaý kórsetý, sondaı-aq oblysymyzdyń áleýmettik-ekonomıkalyq damý mindetterin oryndaýda turǵyndardyń qatysýyn arttyrý arqyly azamattyq qoǵam ınstıtýttarynyń damýyna yqpal etý.

Baıqaý mindetteri:
- ashyqtyq, eseptilik jáne ózara jaýapkershilik qaǵıdattaryna negizdelgen áleýmettik seriktestik negizinde qoǵamnyń áleýmettik mańyzdy máselelerin sheshýde memlekettik organdardyń, kommertsııalyq emes uıymdar men bıznestiń ózara is-qımylyn nyǵaıtý;
- áleýmettik jobalardy júzege asyrý barysynda úkimettik emes uıymdardyń uıymdyq áleýetin arttyrý.

Al baıqaýǵa qatysý úshin qoıylatyn talaptar:
1. Baıqaýǵa úkimettik emes uıymdar derekqoryna aqparat bergen Túrkistan oblysynyń ÚEU-ry qatysa alady.
2. Joba maqsatty toptardyń belsendi qatysýymen qaýymdastyqtardy damytýǵa jáne azamattyq qoǵam uıymdary, jergilikti bılik organdary, bıznes jáne BAQ arasyndaǵy seriktestikti nyǵaıtýǵa baǵyttalýy kerek.
3. Usynylǵan joba uıymnyń jarǵylyq maqsattaryna sáıkes kelýi tıis.
4. Baıqaýǵa usynylǵan jobalarǵa seriktesterdiń kórsetetin qoldaýy seriktestik týraly memorandým, qoldaý hat, nemese basqa da tıisti qujattarmen rastalýy qajet.
5. Ótinimdi tapsyrý kezinde tómende keltirilgen barlyq qajetti qosymshalar usynylýy kerek.
Eń úzdik áleýmettik ıdeıalar men jobalar jármeńkesi baıqaýyna jumystar men qujattar 25 qyrkúıekke deıingi aralyqta qabyldanady.