Túrkistan «aqyldy qalaǵa» aınalady
TÚRKІSTAN. QazAqparat – Túrkistan ortalyǵy kóne kezeńniń sáýlet úlgisin saqtaı otyryp, «aqyldy qalaǵa» aınalady. Bul másele Túrkistan oblysynyń ákimdiginde Ómirzaq Shókeevtiń tóraǵalyǵymen ótken apparat jıynynda talqylandy, dep habarlaıdy QazAqparat tilshisi.
Jıynda qurylys qarqyn alǵan kıeli shahardaǵy ǵımarattar men saıabaqtar, kópirler men alleıalar bir úlgide jaryqtandyrylatyny jáne jańa keıipke enetini aıtyldy. Atalǵan joba aldaǵy birneshe aıdyń ishinde júzege asyp, qalaǵa qaıtalanbas reńk beredi.
Mamandardyń sózinshe, qalanyń sımvolyna aınalǵan Qoja Ahmet ıAsaýı kesenesi de jaryqtandyrylady. Týrıster úshin erekshe tartymdy nysandardyń búkilálemdik tizimine kirgen qasıetti mekenniń qabyrǵalary alystan jarqyrap kózge túsetin bolady. Jınalysta oblystyq mańyzy bar joldarǵa qatysty máseleler de kóterildi. Óńirde jalpy qashyqtyǵy 4 myń shaqyrym jol bolsa, byltyr onyń 1270 shaqyrymy jóndelgen. Aǵymdaǵy jyly 869,8 shaqyrym jol jóndeýden ótedi dep kútilýde. 2021 jyly oblystyq jáne aýdandyq mańyzy bar avtomobıl joldarynyń jaqsy jáne qanaǵatty jaǵdaıdaǵy úlesin 81,4 paıyzǵa deıin ulǵaıtý kózdelgen. Apparat jıynynda oblys basshysy Ómirzaq Shókeev kúrdeli jóndeýge ketetin ýaqyt pen qarajatty únemdeýdi, óńir klımatyna tózimdi sanalatyn qurylys materıaldaryn qoldanýdy tapsyrdy.
Májiliste sondaı-aq, «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev «Qamqorlyq» keshendi baǵdarlamasy jurtshylyq tarapynan joǵary baǵalanǵanyn atap ótti. Turmys taýqymetin tartyp, qıyn jaǵdaıda qalǵan otbasylardy qoldaý baǵytyndaǵy baǵdarlama aıasynda barlyq aýdan-qalalarda jergilikti atqarýshy organ ókilderi, aýdandyq máslıhat depýtattary, bastaýysh partııa uıymdary tóraǵalary jáne jeke kásipkerlerdiń qatysýymen qaıyrymdylyq sharalary ótip jatqanyn jetkizdi.
Onyń sózinshe, 10 kúnde áleýmettik salaǵa jaýapty basqarma jáne aýdan, qala ákimdikteri jáne partııa fılıaly arqyly 700-deı otbasyǵa kómek kórsetilgen. Muqtaj jandar qajetti azyq-túlik jáne kıim-keshekpen, kómirmen qamtamasyz etilgen. Bir azamatqa múgedek arbasy berilip, Otyrar aýdanynda 2 turmysy tómen otbasyǵa demeýshiler esebinen turǵyn úıler satyp alynǵan. Osy aýdanda kómekke zárý otbasylarǵa 2 bas usaq mal taratylyp, Saıram aýdanynda turatyn kópbalaly januıalarǵa kásipkerler kómegimen turǵyn úı salynyp berilgen.
