Túrkistan ákimi qurylys jumystaryn apta saıyn qadaǵalap otyratyn boldy
TÚRKІSTAN.QazAqparat – Túrkistan qalasynyń ákimi shahardaǵy júrgizilip jatqan qurylys jumystaryn aralap kórdi. Buǵan deıin senbi men jeksenbi kúnderi jumystardyń barysyn baqylaıtynyn eskertken Rashıd Aıýpov qurylysshylarǵa jumystardy shıratýdy tapsyrdy, dep habarlaıdy QazAqparat tilshisi.
Shahar basshysy aldymen «Kerýen Saraı» kesheni salynatyn aýmaqty aralap, jumys kestesine sáıkestigin tekserdi. Qurylys jumystaryna 51 tehnıka men 287 adam jumyldyrylǵan. Al, ákimshilik-iskerlik ortalyǵyndaǵy 7 qabatty 24 úıdiń jáne 12 qabatty 39 úıdiń jumys barysyn qadaǵalap, jaýapty mamandarǵa jumysshylar sanyn kóbeıtýdi tapsyrdy. Іsti shıratyp, sonymen birge, qurylysqa qajetti qural-jabdyqtar sapaly bolýyn eskertti.
B. Sattarhanov dańǵyly boıyndaǵy jaıaý ótkinshiler joldaryndaǵy aryqshalar betin jaýyp, adamdarǵa ótýge yńǵaıly jaǵdaı jasaý qajettigin atap ótti. Bastysy qurylys alańynan shyqqan úlken júk kólikteriniń qala aýmaǵyna shyǵar aldyn tazalyǵyna asa mán berýdi jáne kósheni lastamaýyn qatań nazarǵa alýdy jetkizdi. Rashıd Aıýpov munan soń qalany kógildir otynmen qamtamasyz etý maqsatyndaǵy jumystardyń barysymen tanysty. Olardyń nátıjeli júzege asyrylýyn qadaǵalandy.
Máselen, «Birlik» eldimekeninde kúnine 800 metrge deıin gaz qubyrlary qoıylyp, jumysty tolyqtaı mamyr aıynda aıaqtaý josparlanǵan. Jumysqa tartylǵan 58 adamnyń basym bóligi jergilikti turǵyndar. Shahar basshysy qazylǵan jerlerdiń ornyn jaýyp, retimen tas tóseý qajettiligin júzege asyrý qajettiligin aıtty.
Sonymen qatar, ortalyq bazar mańyndaǵy qoqystar men laıǵa, sýǵa tolǵan aryqshalardy úzdiksiz tazalap turý kerektigin qatań eskertti. Sý tolǵan qudyqtardy da kórgen shahar basshysy «Túrkistan-Sý» mekemesi basshysyna olardy jıi tekserip, jiti qadaǵalap turýyn tapsyrdy.
Barlyq qurylysshylar men sala basshylaryna apta saıyn jumystar legin osylaısha qadaǵalap otyratynyn eskertti.
