Túrkistan ákimi kásipkerlermen kezdesti

TÚRKІSTAN. QazAqparat – Túrkistan qalasynyń ákimi Rashıd Aıýpov 200-ge jýyq kásipkermen, shaǵyn jáne orta bıznes ókilderimen kezdesý ótkizdi. Jıyn barysynda kásipkerlikti damytý máseleleri talqylanyp, isker azamattardyń usynys-tilekteri tyńdaldy, dep habarlaıdy QazAqparat tilshisi.

Shahar basshysy bazarlar, qonaq úıler, toıhana men dámhanalar, dúkender jáne ózge de kásipkerlik nysan ıelerine bıylǵy jyldyń ózekti jobalary jaıly jan-jaqty aqparat berdi. Kásipkerlerge árdaıym qoldaý kórsetiletinin jetkizdi.

⠀«Osy jyly qalamyzǵa 2 mıllıonǵa jýyq týrıst keledi dep josparlap otyrmyz. Oǵan sizderdiń qoldaýlaryńyz kerek. Qalamyz jaıly, yńǵaıly jáne qyzyqty bolýy úshin kommertsııalyq baǵyttardy da qarastyrý ústindemiz. Búginde salynyp jatqan qurylysqa qajetti zattardy ózge qalalardan alýǵa týra keledi. Kásipkerlerimiz osyndaı dúnıelerdi ózderi jasap, «Túrkistanda jasalǵan« qurylys taýarlary men ónimderin jandandyrsa degen nıet bildiremin», - dedi qala ákimi.

Rashıd Aıýpov sondaı-aq, úkimettik emes uıymdar, mádenı ortalyqtar basshylary jáne ókilderimen de kezdesý ótkizdi. Shahar basshysy jıyn barysynda qalanyń kórkeıip, gúldenýi úshin bıyl atqarylatyn jobalar jaıly aqparat berdi. Bolashaqta jasalǵan jobalarǵa qarsy pikirler týyndamas úshin búginnen árbir iske kez kelgen turǵyn óz oılaryn ortaǵa salyp, áleýmettik jeli paraqshalaryna joldap otyrýdy surady.

«Qalamyzda «Ashyq bıýdjet» jobasy osy jyly pılottyq rejımde iske asyrylatyn bolady. Polıtsııa, jedel járdem, gaz t.b mańyzdy baǵyttar úshin tek bir ǵana 112 nómirimen baılanysý múmkindigin sáýir aıynan bastap júzege asyrýdy josparlap otyrmyz», - dedi Rashıd Aıýpov.

Túrkistan ákimi turǵyndar tarapynan túsetin shaǵymdardyń kóp bóligi jumystyń sapasy men baqylaý júıesiniń tómen ekendiginde qatysty ekenin aıtyp ótti. Bul baǵytta árbir móltekaýdanda salynyp jatqan nysandardy turǵyndar men belsendi jandar top bolyp baqylap, ákimdikti habardar etip otyrýǵa shaqyrdy. Bul tásil - kemshilikterdi joıýdyń bir kepili ekendigin jetkizdi.