Túrkistan ákimdigi men Ózbekstan qurylys mınıstrligi yntymaqtastyq memorandýmyna qol qoıdy
TÚRKІSTAN. QazAqparat - Túrkistan oblysynyń ákimdigi men «Ózbekstan Respýblıkasy qurylys mınıstrligi» ekijaqty ózara yntymaqtastyq týraly Memorandýmǵa qol qoıdy, dep habarlaıdy óńir basshysynyń baspasóz qyzmeti.
Ortaq Memorandým Qazaqstan men Ózbekstan arasynda bıznestiń básekege qabilettiligin arttyrýdyń mańyzdy mehanızmine aınalmaq. Osylaısha, eki tarap tyǵyz kommertsııalyq baılanystardy damytýǵa, ekijaqty ınvestıtsııalar men tehnologııalardy berý kólemin ulǵaıtýǵa negiz bolmaq.
«Túrkistandy biz tek Qazaqstannyń emes, túrki áleminiń mádenı ortalyǵy etý úshin 3 baǵytta damytýdamyz. Rýhanı-mádenı ortalyq - bizdiń tarıhymyz ben salt-dástúrimizden syr shertetin aýmaq bolady. Munda týrıstik oryndar, etnoaýyl, botanıkalyq baq, kitaphana, teatrlar salynsa, ákimshilik-iskerlik ortalyqta biz otyrǵan oblys ákimdigi alǵashqy nysan retinde paıdalanýǵa berildi. Odan bólek basqarmalar, kongress-holldar salynady. Jalpy, árbir ınvestıtsııalyq jobany qoldaýǵa daıynbyz. Osyǵan sizderdi de úles qosýǵa shaqyramyn», - dedi Ómirzaq Estaıuly kezdesý barysynda.
Osy maqsatta kompanııa Túrkistan oblysynyń qurylys alańyna ınvestıtsııa salý múmkindigin qarastyrýǵa nıetti. Ákimdik óz quzireti sheginde bastamalaryn qoldaý jáne ony iske asyrý úshin qolaıly jaǵdaılar jasaýdy kózdeıdi. Týrkistan oblysy ákiminiń orynbasary M.Myrzalıev pen Ózbekstan Respýblıkasy qurylys mınıstrligi» atynan Mınıstrdiń birinshi orynbasary Sh. Hıdaıatov qol qoıǵan memorandým óńirdi damytýǵa úles qosady dep kútilýde.
