«Turkiss» ánshi qyzdar toby quryldy (FOTO)
ASTANA. QazAqparat - Dastan Orazbekov jańa «Turkiss» atty qyzdar tobyn tanystyrdy.
Ótken jyly sáýirde «Orda» tobynyń múshesi Dastan Orazbekov qyzdardan quralatyn topqa kastıng jarııalaǵan bolatyn. Ánshi qazaqstandyq estradada erekshelenip turatyn top qurmaq nıetti bolǵan. Kastınge qatysqan 500-ge jýyq qyzdyń ishinen Dalıda, Anelı jáne Janar esimdi qyzdar tańdap alynyp, topqa «Turkiss» degen ataý berildi.
Ánshi qyzdardy estradaǵa daıyndaýǵa 10 aı ketken.
Dastan Orazbekovtyń aıtýyna qaraǵanda, toptyń áýeni basqalardan ózgeshe, eshqaısyna uqsamaıdy. Joba Qazaqstanda ǵana emes, Ázerbaıjanda da óner kórsetedi. Toptyń ázerbaıjandyq prodıýseri - Isa Melıkov bir kezderi qarapaıym ánshiler Eldar Gasymov pen Nıgıar Djamaldy «Evrovıdenıe» jeńimpazy deńgeıine deıin jetkizgen prodıýser.
«Turkiss» tobynyń músheleri kishkentaıynan bımen aınalysqan, án salǵan. Dastan Orazbekovke bul sala ázirge tańsyq, sebebi ánshi buǵan deıin tek jigitterden quralǵan toptarmen jumys istep kelgeni málim.
«Men úshin qyzdarmen jumys isteý ómirimdegi eń qıyn kezeń bolatyn shyǵar. Olardyń kózinen qorqynyshty nemese isteı alar ma ekenbiz degen kúmándi kórgende, ózim de qatty qınalamyn», - deıdi prodıýser.
Búginde «Turkiss» toby án jazyp qana qoımaı, oǵan beınebaıan túsirip úlgergen. Beınebaıannyń túsirilimi Kıevte ótti - qazir montaj jumystary júrgizilip jatyr, kóp uzamaı toptyń tuńǵysh týyndysyn kórýge múmkindik týady.
