«Turkish Airlines» əýe kompanııasynyń 200-den astam jolaýshysy Qazaqstanǵa jete almaı otyr
KÓKShETAÝ. QazAqparat - «Turkish Airlines» əýe kompanııasynyń 200-den astam jolaýshysy aýa raıynyń qolaısyzdyǵy saldarynan Qazaqstanǵa jete almaı otyr, dep habarlaıdy "QazAqparat" HAA tilshisi QR Investıtsııalar jáne damý mınıstrligi Týrızm ındýstrııasy departamentiniń basshysy Marat Iǵalıǵa silteme jasap.
Onyń deregi boıynsha, Ystanbul-Almaty baǵytyndaǵy TK 350 əýe reısi (94 jolaýshy), Ystanbul-Astana baǵytyndaǵy TK 354 (120 jolaýshy) reısi keshigip jatyr. Oǵan qosa, Almatydan Ystanbulǵa 150 adam ushyp barýy kerek edi. Onyń 80-i Dýbaı, Baký jəne Məskeý arqyly jóneltildi. Qalǵan 70 adam erteńgi reıspen ushady. Al, Astana-Ystanbul baǵytyndaǵy TK 335 əýe reısinen 7 jolaýshy qaldy. Qalǵandary 8 qańtarǵa josparlanyp otyrǵan TK 345 reısine qaldyryldy. Sonymen qatar, ózge tasymaldaýshy reısterge de bólindi.
"Ystanbuldan Almaty jəne Astanaǵa búgin keshke ushyp keletin reıs keste boıynsha tur. Jalpy, Ystanbuldan Qazaqstanǵa («Turkish Airlines») 214 jolaýshy jete almaı otyr. Əýe kompanııasynyń məlimeti boıynsha jolaýshylarǵa keshikken kezde usynylatyn barlyq qyzmet kórsetilýde. Qazaqstannan Ystanbulǵa kezekti reıspen 77 jolaýshy ushýy tıis", dep túsindirdi ol.
Degenmen, QR Investıtsııalar jáne damý mınıstriniń keńesshisi Təńirbergen Berdiońǵarovtyń habarlaýynsha, qazirgi kezde Ystanbuldan ushaqtar usha bastaǵan.
Osyǵan deıin habarlanǵandaı Ystanbuldan shyǵatyn reıster Túrkııa aýmaǵyndaǵy aýa raıynyń qolaısyzdyǵyna baılanysty keshikken bolatyn. Ystanbulda qatty jel men tolassyz qar jaýyp turǵany baıqalady.
