«Turkish Airlines»-tiń reısteriniń ushýy jarylys qaýpi saldarynan bir apta ishinde úsh ret toqtatyldy
ASTANA. QazAqparat - «Ystambul-Lıssabon» baǵytynda ushatyn «Turkish Airlines» kompanııasynyń jolaýshylar ushaǵy ushýyn toqtatyp, Ystambul halyqaralyq áýejaıyna oraldy.
Túrkııalyq BAQ habarlaǵandaı, ol jarylys qaýpi saldarynan ushýyn toqtatqan. Bul laınerdiń sońǵy aptadaǵy úshinshi ret apattyq jaǵdaıda qonýy, dep habarlady Bı-bı-sı.
30 naýryzda «Ystambul-San-Paýlý» baǵytynda ushqan «Boıng-777» ushaǵy salonynda «bomba» degen jazýy bar hat tabylǵan soń Kasablanka áýejaıyna qonǵan. Al 29 naýryzda «Turkish Airlines»-tiń «Ystambul-Tokıo» reısi osy syndy jazba tabylǵan soń jerge qondy. Eki jaǵdaıda da habarlama jalǵan bolyp shyqqan.
