Turkish Airlines áýe kemeleriniń parki 2033 jylǵa deıin 813 ushaqqa jetedi

ASTANA. KAZINFORM — Túrkııanyń ulttyq áýe tasymaldaýshysy Turkish Airlines 225 jańa ushaq satyp alýdy josparlap otyr. Qazirgi ýaqytta 75 ushaqqa kelisimsharttar qol qoıylǵan. Bul týraly THY basqarmasynyń tóraǵasy Ahmet Bolat málimdedi, dep Azertadj jazdy.

Onyń aıtýynsha, 2033 jylǵa qaraı Turkish Airlines áýe kemeleriniń parki 813 ushaqqa jetedi.

— THY-diń jolaýshylar aǵyny 85 mıllıon adamǵa jetti, al jyldyq tabysy 22 mıllıard dollardy quraıdy. Qazirgi ýaqytta Turkish Airlines-te bir jolaýshydan ortasha tabys 22-23 dollardy quraıdy, — dep atap ótti Ahmet Bolat.

Sondaı-aq ol ushaq qozǵaltqyshtaryn kútý shyǵyndaryna da nazar aýdardy.

— Ortasha alǵanda, qozǵaltqyshty tehnıkalyq tekserýden ótkizý 7-8 mıllıon dollarǵa túsedi. 30 jyl ishinde bir ushaq alty ret tekserýden ótedi. Osy shyǵyndardy azaıtý úshin ushaq satyp alý kezinde tehnıkalyq tekserýdi óndirýshimen aldyn ala kelisip alý qajet. Eger bul jumystardy Turkish Airlines ózi atqarsa, arnaıy tehnıkalyq alańdar qurý kerek. Mysaly, bizdiń kompanııa Rolls-Royce qozǵaltqyshtaryn tekserý úshin tehnıkalyq baza salyp jatyr. Osy maqsatqa 300 mıllıon dollar bólindi, — dedi ol.

Aıta keteıik, Túrkııada jyldyq ınflıatsııa deńgeıi qaıtadan kóterildi.