Túrkimenstandaǵy prezıdent saılaýynda turǵyndardyń 97 paıyzy daýys berdi

AShHABAD. QazAqparat – Túrkimenstanda kezekten tys prezıdent saılaýy aıaqtaldy. Oǵan saılaýshylardyń 97 paıyzy qatysqan, dep habarlaıdy QazAqparat tilshisi.

Daýys berý nátıjesi jeti kúnniń ishinde jarııalanady.

Ortalyq saılaý komıssııasynyń derekterine saı, elde 3,43 mıllıon adam daýys berý quqyǵyna ıe, 2 577 saılaý ýchaskeleri uıymdastyrylǵan.

Saılaý barysyn 2 726 ulttyq baqylaýshy, sonymen qatar TMD elderinen baqylaýshylar mıssııasy qadaǵalap otyrady. Prezıdenttikke úmitker retinde 9 adam tirkeldi. Olardyń arasynda Túrikmenstannyń qazirgi prezıdenti Gýrbangýly Berdymuhamedovtiń uly da bar.

Daýys berý jergilikti ýaqytpen saǵat 19:00-de aıaqtaldy.

Eske salsaq, buǵan deıin Túrikmenstan kóshbasshysy Gýrbangýly Berdymuhamedov bılikti jastarǵa berý týraly aıtty.