Túrkimenstanda jarylys saldarynan elektr stansasynyń jumysshylary qaýipsiz jerge kóshirildi
ASTANA. 8 shilde. QazAqparat - Túrkimenstannyń Abadan qalasyndaǵy qarý-jaraq qoımasyndaǵy jarylystyń saldarynan Ashǵabadty jaryqpen qamtamasyz etip otyrǵan Bezmeın GRES-iniń jumysshylary qaýipsiz jerge kóshirildi,
dep habarlaıdy RBK agenttigi.
Oqıǵanyń saldarynan qalanyń tutas batys bóligi jaryqsyz qalyp otyr, dep habarlaıdy jergilikti basylymdar.
Abadanǵa áskerı tehnıka kolonnasy men jádel járdem mashınalary jóneltilip otyr. Kýágerlerdiń aıtýynsha, qala kóshelerinde jarylmaı qalǵan snarıadtar shashylyp jatyr. Kóptegen úılerdiń tereze shynylary synǵan, qala boıynsha elektr, sý jáne gaz júıeleri ajyratyldy.
Túrkimen ókimetiniń aıtýynsha, Abadandaǵy jarylysqa «otshashýlarǵa arnalǵan pırotehnıkalyq quraldardyń aptap ystyqtyń saldarynan tutanýy» sebep bolǵan. Tótenshe oqıǵaǵa baılanysty el prezıdenti Qurbanquly Berdymuhamedovtyń tóraǵalyǵymen mınıstrler kabıneti men qaýipsizdik keńesiniń shuǵyl keńesi ótti.
Sheneýnikterdiń baıan etýinshe, «Abadandaǵy jarylystan qurban bolǵandar joq jáne anaý aıtqandaı qıraýlar bolmaǵan». Halyqqa qajetti medıtsınalyq kómek kórsetilýde. Oqıǵa ornyna jaqyn mańda turǵan turǵyndar qaýipsiz jerge kóshirildi.
