Túrkimenstanda jańa ýnıversıtet ashyldy

ASTANA. QazAqparat - Jańa oqý jylynda Túrkimenstan astanasy Ashhabadta Oǵyz han atyndaǵy ınjenerlik-tehnologııalyq ýnıversıteti alǵashqy stýdentterine esigin ashty.

Jańa bilim ordasynyń ashylý saltanatyna qatysqan Túrkimenstan Prezıdenti Gýrbangýly Berdymuhamedov ýnıversıtettiń ǵylymı-tehnıkalyq bazasymen tanysty, dep habarlaıdy TWESCO saıty.

Sonymen qatar, saltanatty sharaǵa Túrikmenstanda tirkelgen dıplomatııalyq mıssııalardyń ókilderi qatysty.

12 gektar aýmaqqa ornalasqan ýnıversıtette bir mezgilde 3 myń stýdent bilim alýy úshin bar jaǵdaı jasalǵan. Joǵary oqý ornynda 5 fakýltet, 15 kafedra men ǵylymı-zertteý ortalyǵy bar. 

Aty aıtyp turǵandaı, ýnıversıtet stýdentteri jańa materıaldar tehnologııalary, nanomaterıaldar, hımııalyq tehnologııa, aqparattyq júıe men tehnologııasy, mehatronıka, avtomattandyrý jáne basqarý, ınnovatıka men robototehnıka salalary boıynsha dáris alady.

Jańa oqý ordasynyń birden-bir ereksheligi: oqytý júıesi tek aǵylshyn tilinde júrgiziledi.

Aıta ketý kerek, 2016-2017 oqý jyly atalǵan ýnıversıtetke 280 stýdent qabyldandy.