Túrkimenstan jaǵalaýynda taǵy bir ázerbaıjandyq munaıshynyń denesi tabyldy
ASTANA. QazAqparat - «Gıýneshlı» ken ornyndaǵy №10 tuǵyrda bolǵan apat kezinde iz-túzsiz ketken taǵy da bir ázerbaıjandyq munaıshynyń denesi Túrkimenstan jaǵalaýynan tabyldy. Bul týraly Trend basylymy Ázerbaıjannyń TJM baspasóz qyzmetine silteme jasaı otyryp habarlaıdy.
Ázerbaıjannyń TJM Kaspıı jaǵalaýyndaǵy elderdiń qutqarý qyzmetterine jibergen ótinishi boıynsha bastalǵan izdestirý-qutqarý jumystary nátıjesinde, «Kýrsor» kemesi Túrkimenstan jaǵalaýynan 65 shaqyrym qashyqtyqta er adamnyń óli denesin tapty.
Jaqyn mańaıdaǵy «Topaz Legenda» atty túrkimendik kemege aqparat jiberilip, keıin keme munaıshynyń denesin Qııańly portyna jetkizdi. Qaıtys bolǵan munaıshynyń kıiminde «Ázerbaıjanmunaı» degen jazý bar bolyp shyqty.
Esterińizge sala ketsek, 2015 jyly 4 jeltoqsanda qatty daýyl kezinde sý astyndaǵy joǵary qysymdy gaz qubyryna zaqym kelip, onyń saldarynan ázerbaıjandyq SOCAR memlekettik kompanııasyna tıesili «Gıýneshlı» ken ornyndaǵy tuǵyrnama órtke oranǵan edi. Qolǵa alynǵan qutqarý sharasy barysynda 33 munaıshy qaýipsiz jerge kóshirildi. Qazirgi ýaqytta qurban bolǵan toǵyz adamnyń denesi tabyldy, al qalǵan 21 munaıshy habar-osharsyz ketkenderdiń qatarynda.
