«Túrkige ortaq termın jasaýǵa umtylýymyz kerek» - respýblıkalyq basylymdarǵa sholý

TANA. 19 qarasha. QazAqparat - Qazaq aqparat agenttigi respýblıkalyq basylymdarda 19 qarasha, senbi kúni shyqqan ózekti materıaldarǵa sholýdy usynady.

Keshe QR Prezıdenti Nursultan Nazarbaev Máskeý qalasynda ótken Joǵary Eýrazııalyq ekonomıkalyq keńestiń 1-shi otyrysyna jáne Keden odaǵyna múshe memleketter basshylarynyń kezdesýine qatysty. Osyǵan oraı «Egemen Qazaqstan» gazetinde «Keden odaǵyna múshe memleketter Birtutas ekonomıkalyq keńistik qalyptastyrýǵa múddelik tanytty» degen taqyryppen kólemdi maqala jaryq kórdi. «Ortaq múdde kózdelgen bul kezdesýdiń ózindik syr-sebebi de joq emes. Keden odaǵyna múshe Qazaqstan, Belarýs jáne Reseı basshy­larynyń bir ústel basynda osylaısha bas qosýynyń maqsaty úsh memlekettiń 2012 jyldyń 1 qańtarynda kúshine enetin Birtutas eko­nomıkalyq keńistik týraly halyqaralyq kelisim-shartyna baı­la­nysty Eýrazııalyq keńistiktegi ıntegratsııanyń kókeıkesti máseleleri boıynsha kelissóz júrgizý boldy», dep jazady basylym.

Osy basylymnyń atap ótýinshe, keshe Qazaqstan Respýblıkasynyń Syrtqy ister mınıstri Erjan Qazyhanov Astanaǵa resmı saparmen kelgen Serbııa Respýblıkasynyń Syrtqy ister mınıstri Výk Eremıchpen kezdesip, kelissóz júrgizdi. Eki saǵatqa jýyq ýaqytqa sozylǵan kelissóz barysynda ekijaqty jáne kópjaqty yn­ty­maqtastyq máseleleri talqylandy. E.Qazyhanov óz sóz­in­d­e Qazaqstan men Serbııa ara­syn­daǵy saıası, saýda-ekono­mıkalyq jáne mádenı-gý­ma­nıtarlyq qa­ty­nastar jemisti damýda ekenine erekshe ekpin túsirdi.

***

«Ózara týys túrkiler arasyndaǵy termınjasam máselesin 20 ǵasyr basynda Ahmet Baıtursynov bastaǵan Alash qaıratkerleri kóterip ketken bolatyn. Áli de ózektiligin joımaǵan osy máselege «eshten kesh jaqsy» dep bilek sybana kiriskennen utarymyz mol ekendigi daýsyz. Astanada ótken «Túrkitildes elderdiń termınqor qalyptastyrý tájirıbesi» atty halyqaralyq konferentsııa barysynda osy jaıtty ańǵardyq», dep jazady «Alash aınasy» gazeti. Maqalada jazylǵan jaıtpen egjeı-tegjeıli tanys bolǵyńyz kelse, búgingi nómirdegi «Túrkige ortaq termın jasaýǵa umtylýymyz kerek» degen maqalaǵa nazar salyńyz.

«Aıqyn» gazetiniń jazýynsha, «Samuryq-Qazyna» Ulttyq ál-aýqat qory aǵymdaǵy jyly satyp alýlardaǵy qazaqstandyq qamtýdyń úlesin 55 paıyzǵa deıin jetkizýdi kózdep otyr. Bul týraly atalǵan qordyń basqarýshy dırektory Nurjan Baıdáýletov málim etken. «Qoldaǵy derekterge júginsek, osy jyldyń 9 aıynda jasalǵan sharttardyń jalpy somasy 3 trln. 430 mlrd teńgeni qurady. Onyń ishinde holdıngtiń satyp alýdaǵy qazaqstandyq qamtý orta eseppen 49 paıyzdy quraǵan», - dep jazady basylym.

***

«Premer-Mınıstr Kárim Másimov keshe Serbııanyń Syrtqy ister mınıstri Výk Eremıchpen kezdesti», - dep jazady «Kazahstanskaıa pravda» gazeti. Basylymnyń atap ótýinshe, áńgime barysynda taraptar saýda-ekonomıkalyq qa­rym-qa­ty­nastardy damytý, onyń ishinde agro­óner­ká­sip­tik sektor, far­matsevtıkalyq sala­da­ǵy yn­tymaqtastyqty da­mytý máse­lelerin, sondaı-aq eki eldiń tranzıttik-kólik áleýe­tin paıdalaný máse­le­sin talqy­la­dy. 2011 jyldyń 9 aıynda Qa­zaqstan men Serbııanyń ara­syn­daǵy ózara saýda-sat­tyq kólemi 7,7 mln. AQSh dol­laryn qurady.