Túrki jurty bir-birin aýdarmasyz túsinýi qajet - Til komıteti
Sonda ǵana biz mádenıet, ǵylym men ádebıet salasynda biraz jetistikterge jete alamyz. Bul pikirin búgin Astanada ótken is-shara barysynda Mádenıet jáne aqparat mınıstrligi Til komıtetiniń tóraǵasy Sherýbaı Qurmanbaıuly bildirdi.
Ǵalymnyń paıymdaýynsha, túrki álemin jaqyndastyrý úshin túbi bir halyqtar bir-biriniń ǵylymı eńbekterin aýdaryp, eki jaqty rýhanı baılyqty baıyta túsýi qajet. Osynyń arqasynda barlyǵy eskilik psıhologııasynan arylyp, bir kezderi bolǵan «keńestik qamaldy» buza alady.
«Negizi, qazirgi kezde túrki halyqtary ózara jaqyndap keledi. Bizdiń tilderimiz de uqsas. Bul baılanys kúsheıe tússe, biz mádenıet pen ǵylym salasynda ortaq bastamalardy birge atqara alamyz. Máselen, nemis halyqtary búginde bes-alty memleket bolyp, toptasyp, nemis tilindegi ǵylymı keńistikti qalypstyrý arqyly biraz jetistikterge jetip otyr. Sol sııaqty slavıan halyqtary da bir-birin aýdarmasyz túsine beredi. Sondyqtan biz de sóz derbestigin saqtap, leksıkalyq uqsastyqty paıdalana otyryp, ortaq bir termınologııa qoryn qalyptastyra alamyz. Túrki jurty bir-birin aýdarmasyz túsinetin jaǵdaıǵa jetýi qajet», - deıdi Sh.Qurmanbaıuly.
