Túrki memleketteriniń yntymaqtastyq sammıti túrki áleminiń ıntegratsııasy jolyndaǵy mańyzdy beles - N.Nazarbaev

ASTANA. QazAqparat - Túrki memleketteriniń yntymaqtastyq sammıti túrki áleminiń ıntegratsııasy jolyndaǵy mańyzdy beles. Búgin Aqordada ótip jatqan Túrki memleketteri yntymaqtastyǵynyń besinshi sammıtiniń otyrysynda QR Prezıdenti Nursultan Nazarbaev osylaı málim etti.

Sóz basynda Elbasy jıynǵa qatysýshylarǵa rızashylyǵyn bildirip, «túrkilerdiń baıyrǵy ataqonysy Qazaq jerine qosh keldińizder» dep atap ótip, ótken kezeńde keńeske tabysty tóraǵalyq etken Túrkııaǵa alǵysyn bildirdi.

«Baýyrlas elderimizdiń 1992 jyly bastalǵan baılanystary Túrki tildes memleketteriniń yntymaqtastyǵy keńesine ulasty. Osy Túrki keńesiniń mereıtoılyq besinshi sammıti qazaq jerinde Astanada ótip otyr. Muny men Túrki áleminiń ıntegratsııa jolyndaǵy mańyzdy belesi dep sanaımyn», -dedi jıyndy ashyp sóz sóılegen Elbasy.

Prezıdenttiń aıtýynsha, uıym qurylǵaly beri memleketter arasynda yntymaqtastyq jolǵa qoıylyp otyr.

«Tórtinshi sammıtte túrki áleminiń ıntegratsııasy tujyrymdamasyn ázirleýge tapsyrma bergen bolatynbyz. Tujyrymdama jobasyn Túrki akademııasy daıyndady. Mańyzy kún ótken saıyn artyp kele jatqan osy qujatty qabyldaýdy tezdetýimiz kerek», -dedi N. Nazarbaev.