Túrki memleketteri uıymy Syrtqy ister mınıstrleriniń keńesi ótti

SAMARQAND. QazAqparat - Túrki memleketteri uıymynyń (TMU) 9-shy sammıti qarsańynda Syrtqy ister mınıstrleriniń keńesi ótti. Bul týraly QazAqparat SІM silteme jasap habarlaıdy.

Qazaqstandyq delegatsııany Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi basqardy.

SІM basshysy óz sózinde Qazaqstannyń túrki yntymaqtastyq uıymdary sheńberindegi óz mindettemelerine berik ustanymyn jáne múshe memleketterdiń yntymaqtastyǵyn odan ári damytýǵa, ekonomıkalyq jáne mádenı ózara is-qımylyn nyǵaıtýǵa, sondaı-aq Uıymnyń tıimdiligin arttyrýǵa úles qosýǵa daıyn ekendigin atap ótti.

Otyrys barysynda qatysýshylar TMU memleketteri basshylarynyń qatysýymen ótetin 9-sammıttiń kún tártibindegi máselelerdi talqylady, atap aıtqanda, osy is-shara barysynda qol qoıýǵa jáne qabyldaýǵa josparlanǵan qujattar men sheshimderdiń jobalary bekitildi.

Túrki memleketteriniń uıymy (TMU) Qazaqstannyń bastamasymen 2009 jyly Nahchyvan qalasynda (Ázerbaıjan) quryldy. TMU Hatshylyǵy Ystanbul qalasynda (Túrkııa) ornalasqan. Qazirgi ýaqytta Uıymǵa Ázerbaıjan, Qazaqstan, Qyrǵyzstan, Túrkııa jáne Ózbekstan kiredi. Majarstan men Túrikmenstan baqylaýshy mártebege ıe.

Foto:gov.kz