Túrki memleketteri úshin odaq qurýdyń qajeti joq - professor Ortaıly

ASTANA. QazAqparat - Tanymal túrik tarıxshysy, professor Ilber Ortaıly Túrki memleketteriniń odaǵyn qurýǵa qatysty pikir bildirdi. Ǵalym Nazarbaev Ýnıversıtetinde túrki álemi jáne túrkologııa máseleleri boıynsha dáris oqydy, dep xabarlaıdy QazAqparat tilshisi.

«Negizi, túrki memleketteri kóp. Olar sol kóptigimen myqty. Biraq mindetti túrde Eýropa Odaǵy sııaqty birigýdiń qajeti joq dep oılaımyn. Arabtar da ózara birigip, odaq quryp jatyr. Menińshe, bundaı odaqtardyń qajeti joq. Onyń bári - qur áýreshilik. Eýropa odaǵy da álsireı bastady. Ulybrıtanııa odan shyǵyp jatyr. Óıtkeni Brıýsselde bıýrokratııa kóp. Ondaı ortalyqqa eshkim jumys istegisi kelmeıdi. Sondyqtan ortalyq bir ákimshilikti qurýdyń qajeti shamaly. Bizde ekonomıkalyq yntymaqtastyq bar, bilim-ǵylym salasynda da ózara alys-berister kóp. Árkim ózine qaraı jumys isteýi kerek. Biraq mádenı baılanystardy úzbeý qajet», - dedi I.Ortaıly suraq-jaýap sessııasy kezinde.

Ǵalymnyń oıynsha, túrki memleketteriniń ekonomıkalyq odaǵyn qurýǵa bolady. Biraq saıası uıymnyń qajeti shamaly.

«Bizde «til» degen biriktirýshi faktor bar. Sosyn bilim men ǵylymdy damytýymyz qajet. Teatr men kıno jaǵy da óte mańyzdy. Aqparattyq texnologııalar bar. Qazirgi zaman ónerin de birlesip damytýmyz qajet. Sonyń bárin birge istesek, biraz jetistikke jete alamyz», - dep atap kórsetti I.Ortaıly.