Túrki keńesiniń jazǵy lageri jastardy jaqyndastyra tústi - uıymdastyrýshylar
«Túrkitildes memleketterdiń jastary birigip, bir-birimen dostyq qatynas ornatý arqyly jas urpaq túp-tamyrymyzdyń bir ekenine kóz jetkizdi. Sózsiz, uıymdastyrýshylar kóp jumys jasady. Joba baǵdarlamasynyń jınaqylyǵy erekshe boldy», - deıdi «Jastar» ǵylymı zertteý ortalyǵynyń dırektory Talǵat Qalıev.
Uıymdastyrýshylardyń biri Dáýlet Káribektiń aıtýynsha, meıman bolyp kelgen úsh eldiń jastary elderine jetkennen keıin habarlasyp, zor alǵystaryn bildirgen. Onyń aıtýynsha, atalǵan sharany aqparattyq qoldaý jaǵynan Qazaqstan kemshin túspegen.
«Halyqaralyq Túrki akademııasynyń prezıdenti Darxan Qydyráli, «QazAqparat» HAA bas dırektory Asqar Ýmarovtaı azamattardyń kelýi lagerdi tıis deńgeıinen joǵary kóterip áketti. Bizge kúni búginge deıin Qyrǵyz Respýblıkasy, Túrkııa, Ázerbaıjan elderinen alǵys hattar kelip túsip jatyr», - deıdi Dáýlet Káribek.
Túrki keńesiniń alǵashqy lageri ótken jyly Túrkııada uıymdastyrylǵan. Kelesi lager Ázerbaıjanda nemese Qyrǵyz Respýblıkasynda ótedi.
Eske sala ketsek, 2009 jyly Elbasy Nursultan Nazarbaev «Túrki keńesin» qurý týraly bastama kótergen bolatyn. Sodan beri osy keńes quramyndaǵy Qazaqstan, Túrkııa, Ázerbaıjan men Qyrǵyz Respýblıkasynyń jastary ózara mádenı seriktestikti nyǵaıtýǵa kúsh salyp keledi. Túrki keńesi aıasynda bıyl 10-16 shilde aralyǵynda Aqmola oblysy Zerendi aýylynda atalǵan tórt memlekettiń 18-25 jas aralyǵyndaǵy 100-ge jýyq jas ókilderiniń qatysýymen halyqaralyq jazǵy lager uıymdastyrylǵan. Lagerdi ótkizý barysynda bilikti jattyqtyrýshylar men spıkerler shaqyrylyp, trenıngter, kóshbasshylyq qasıetterdi damytýǵa baǵyttalǵan sheberlik synyptary, smm jyljytýǵa baǵyttalǵan semınarlar ótkizilgen.
