Túrki keńesiniń kezekti sammıtinde ulttyq sport jáne jastar saıasaty talqylanady

ASTANA. QazAqparat - 3 qyrkúıekte Qyrǵyzstanda Túrki keńesiniń VI sammıti bastalady. Jıynda túrki ıntegratsııasyn sport jáne jastar saıasaty arqyly nyǵaıtýdyń múmkindikteri talqylanatyn bolady, dep habarlaıdy QazAqparat TWESCO saıtyna silteme jasap.

«Ulttyq sport túrleri men jastar saıasaty salasyndaǵy yntymaqtastyq» degen taqyrypta ótetin Sammıtke Ázerbaıjan Prezıdenti Ilham Álıev, Qazaqstan Prezıdenti Nursultan Nazarbaev, Qyrǵyzstan Prezıdenti Sooronbaı Jeenbekov jáne Túrkııa Prezıdenti Rejep Taıyp Erdoǵan qatysady dep kútilýde. Sonymen qatar, bıylǵy Sammıtke Ózbekstan tarapynyń da qyzyǵýshylyǵy joǵary ekendigi aıtylǵan, Atap aıtqanda, Ózbekstan prezıdenti Shav­hat Mırzıeev jıynǵa keledi dep kútilýde.

Sammıt kezinde túrki ıntegratsııasyn mádenıet, sport jáne bilim berý salalarynda tereńdete túsý týraly pikir almasylady. Sonymen birge,  VI sammıt kezinde birqatar qujattarǵa qol qoıylady. Olardyń qatarynda TWESCO qyzmetine tikeleı qatysty qujattar da bar.

Esterińizge salar bolsaq, Túrki keńesiniń kezekti sammıti araǵa úsh jyl salyp uıymdastyrylyp otyr. Túrkitildes memleket terdiń basshylary osy formatta 2015 jyly Astanada kezdesken bolatyn. Al, Túrki keńesi memleket basshylarynyń sammıti alǵash ret 2011 jyly Almatyda «Túrkitildes elderdiń ekonomıkalyq yntymaqtastyǵy», 2012 jyly Bishkekte «Mádenı-gýmanıtarlyq saladaǵy yntymaqtastyq», 2013 jyly Ázerbaıjannyń Gabala qalasynda «Kólik jáne kommýnıkatsııa salasyndaǵy yntymaqtastyq», 2014 jyly Túrkııanyń Bodrým qalasynda «Týrızm salasyndaǵy yntymaqtastyq», 2015 jyly Astanada «Aqparat salasyndaǵy yntymaqtastyq» degen taqyryptarmen ótken bolatyn.

Túrkitildes memleket basshylarynyń VI sammıtinde Qazaqstan keńeske tóraǵalyq qyzmetin Qyrǵyzstan Respýblıkasyna tapsyrady.