Túrki keńesiniń kelesi sammıti qaıda ótedi

ShOLPAN-ATA. QazAqparat - Búgin Ystyq kóldiń jaǵasynda Túrki elderi yntymaqtastyq keńesiniń VI sammıti ótti. Alqaly jıynǵa Qazaqstan, Qyrǵyzstan, Túrkııa, Ázerbaıjan, Ózbekstan men Majarstan basshylary qatysty, dep habarlaıdy QazAqparat tilshisi.

Sammıt barysynda Qazaqstan Prezıdenti uıymnyń tóraǵalyq mindetin Qyrǵyzstanǵa tapsyrdy.

Sondaı-aq, Nursultan Nazarbaev keńeske qarasty keıbir uıymdardy qysqartýdy usyndy.

Al keńes músheleri QR Prezıdenti Nursultan Nazarbaevtyń usynysyn maquldady.

Aldaǵy ýaqytta «Rýhanı jańǵyrýdyń» jobalary túrki álemine taralady.

Sammıtten keıin Túrki keńesiniń jańadan taǵaıyndalǵan Bas hatshysy Baǵdat Ámireev osy uıymǵa Ózbekstannyń qosylýyna qatysty túsinik berdi.

«Ózbekstan Túrki keńesiniń múshesi emes. Alaıda ózbek eliniń basshylary kópten beri sammıtterdiń jumysyna qatysyp keledi. Olar túrki tildes elderdiń dostyǵyn, qashanda óz baýyrlaryn qoldaıdy. Jaqyn arada Ózbekstannyń Túrki keńesindegi músheligi rásimdeledi dep senemiz. Ol úshin barlyq alǵysharttar bar», - dep atap kórsetti B.Ámireev.

Onyń aıtýynsha, keńeske múshe memleket basshylary birlesken deklaratsııany qabyldady. Atalǵan qujatta atqarylǵan jumysqa qorytyndy jasalyp, aldaǵy maqsat-mindetter aıqyndalǵan. 

«Sonymen birge, osydan úsh jyl buryn Astanada ótken sońǵy sammıtte el basshylary Túrki tildes memleketter ıntegratsııasynyń tujyrymdamasyn ázirleýdi usynǵan bolatyn. Sol qujat daıyn boldy. Búgin tujyrymdamaǵa qol qoıyldy. Bul - óte mańyzdy qujat. Sebebi, túrki tildes elderdiń yntymaqtastyǵyn damytýdy kózdeıdi», - dedi B.Ámireev Túrki keńesiniń VI sammıtinen keıin jýrnalısterge bergen suhbatynda.

Budan bólek, búgin Majarstanǵa baqylaýshy mártebesi berildi. 

Túrki keńesiniń kelesi sammıti Ázerbaıjannyń Baký qalasynda ótedi. Aıta ketken jón, sammıt jyl saıyn uıymdastyrylady.