Túrki keńesi kólik mınıstrleriniń kezdesýi Bishkekte ótti

BІShKEK. QazAqparat - Túrki keńesi kólik mınıstrleriniń 4-shi kezdesýi Bishkek qalasynda ótti. Jıynǵa Túrki keńesiniń Bas hatshysy Baǵdad Ámireev, Qyrǵyz Respýblıkasynyń Kólik jáne joldar mınıstri Janat Beıshenov, Qazaqstan Respýblıkasy Indýstrııa jáne ınfraqurylymdyq damý vıtse-mınıstri Berik Qamalıev, Túrkııa Respýblıkasy Kólik jáne ınfraqurylym mınıstriniń orynbasary Selım Dýrsýn, Ázerbaıjan Respýblıkasy Kólik, kommýnıkatsııa jáne joǵary tehnologııalar mınıstrligi Kólikti baqylaý departamentiniń bastyǵy Djavıd Nadjafov, Majarstan Innovatsııalar jáne tehnologııalar mınıstrliginiń Kólik saıasatyna jaýapty memlekettik hatshysy Laslo Mosochı qatysty. Bul týraly QazAqparat Túrki keńesiniń baspasóz qyzmetine silteme jasap habarlaıdy.

Jıyn barysynda Bas hatshy Baǵdad Ámireev kólik salasynyń áleýmettik-ekonomıkalyq damýdaǵy mańyzy men rólin atap ótti. Onyń aıtýynsha, kólik - keńeske múshe memleketter arasynda jalǵasyp kele jatqan yntymaqtastyqty nyǵaıtý turǵysynan erekshe qyzyǵýshylyq týdyratyn negizgi baǵyttardyń biri. Budan bólek, Bas hatshy Transkaspıı kólik dálizinde sońǵy eki jylda bolǵan mańyzdy ózgeristerge toqtalyp, «Baký-Tbılısı-Kars» temir joly, «Marmaraı» temirjol týnneli, «ıAvýz Sultan Selım» kópiri jáne «Eýrazııa» týnneli sekildi jobalardyń mańyzyn atap ótti.

Kezdesýde múshe memleketter Transkaspıılik kólik dálizi boıynda saýda kerýenin tanystyratyn týrlar uıymdastyrý týraly pikir almasty. Budan bólek, taraptar 2019 jyldyń mamyr aıynda Aqtaý qalasynda Halyqaralyq logıstıkalyq forým ótkizýge kelisti. Ol forýmǵa múshe memleketter men aımaqtaǵy elderdiń barlyq kólik qyzmet túrlerin kórsetetin (jol, temirjol, teńiz, áýe) kompanııalar, teńiz porttary, qurǵaq porttar men logıstıkalyq ortalyqtardyń ókilderi, sondaı-aq bedeldi aımaqtyq jáne halyqaralyq uıymdardyń ókilderi shaqyrylatyn bolady.

Óz kezeginde QR Indýstrııa jáne ınfraqurylymdyq damý vıtse-mınıstri Berik Kamalıev Aqtaý qalasynda Túrki keńesimen birlese otyryp Halyqaralyq logıstıkalyq forým ótkizýge daıyn ekendigin atap ótti. Osyǵan baılanysty, vıtse-mınıstr Túrki keńesiniń múshe memleketterdi osy forýmǵa belsendi qatysýǵa shaqyrdy.

Kezdesý sońynda qatysýshy teńiz porttarynyń ókilderi «Quryq» portyna Túrki keńesiniń Baýyrlas porttary protsesine múshe bolýǵa múmkindik beretin qosymsha hattamaǵa qol qoıdy.

Túrki keńesi kólik mınıstrleriniń kezekti 5-shi kezdesýi 2020 jyly Býdapesht qalasynda (Majarstan) ótkiziletin bolady.