Túrki keńesi elderindegi kompanııalar úshin bıznes-forým uıymdastyramyz – Majarstan mınıstri

NUR-SULTAN. QazAqparat –Túrki keńesi elderindegi kompanııalar úshin úlken bıznes-forým ótkizemiz. Bul týraly elordada QR Premer-Mınıstriniń orynbasary – Syrtqy ister mınıstri Muhtar Tileýberdimen kelissózderden keıin Majarstan Syrtqy ekonomıkalyq baılanystar jáne syrtqy ister mınıstri Peter Sııarto málim etti, dep habarlaıdy QazAqparat tilshisi.

QR Syrty ister mınıstrliginde tilshiler P. Sııartodan Túrkitildes memleketterdiń yntymaqtastyq keńesine qatysty Majarstannyń jospary jaıynda surady.

2018 jyldan beri Túrki keńesinde Majarstan baıqaýshy el mártebesin aldy.

«Elimiz atalǵan keńeske baıqaýshy retinde qatysyp keledi. Jalpy, Túrki keńesiniń barlyq memleketterimen strategııalyq qatynastardy damytý maqsatyn belgilegen edik. Osy tyǵyz baılanystardy bastaǵan elderdiń arasynda Qazaqstan birinshi boldy. Qazirgi kezde barsha Túrki keńesiniń barsha elimen strategııalyq sharttardy bekittik», - dedi Peter Sııarto.

Osy oraıda ol «Túrki áleminiń keleshegi-2040» strategııasyn ázirleýdiń, sondaı-aq Túrki ınvestıtsııalyq qoryn qurýdyń mańyzdylyǵyn atap ótti.

«Biz osy qordyń jumysyna qatysatyn bolamyz. Pandemııa toqtaǵannan keıin, biz aýqymdy bıznes-forým ótkizýdi josparlap otyrmyz. Oǵan osyndaı yntymaqtastyqqa múddeli Túrki keńesi elderindegi kompanııalar qatysa alady», - dedi Majarstan mınıstri.

Eske sala keteıik, jaqynda Túrkitildes memleketter yntymaqtastyǵy keńesiniń beıresmı sammıti ótti. Beıresmı sammıtti Memleket basshysy Qasym-Jomart Toqaev ashyp, júrgizdi. Jıynǵa Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev, Túrkııa Prezıdenti Rejep Taııp Erdoǵan, Ázerbaıjan Prezıdenti Ilham Álıev, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Gýrbangýly Berdimuhamedov, Majarstan Premer-mınıstri Vıktor Orban, Túrki tildes memleketterdiń yntymaqtastyq keńesiniń Bas hatshysy Baǵdad Ámireev qatysty.

QR Prezıdenti Q. Toqaev Túrki ınvestıtsııa-ıntegratsııalyq qoryn qurý jumystaryn tezdetý kerektigin aıtty.

Túrki tildes memleketterdiń yntymaqtastyq keńesiniń Bas hatshysy Baǵdad Ámireev atalǵan bastamaǵa qatysty usynys jasaǵan bolatyn.

«Túrki ınvestıtsııalyq qoryn qurý jónindegi jumysty tezirek aıaqtaý maqsatynda osy másele boıynsha sheshim qabyldaý jáne ony kezekti sammıtte sizderdiń maquldaýlaryńyzǵa engizý úshin, taıaý aılarda múshe memleketterdiń ekonomıka ári qarjy mınıstrleriniń otyrysyn ótkizýdi oryndy dep sanaımyn», - dedi B. Ámireev.