Túrki keńesi elderi jastar saıasaty salasyndaǵy yntymaqtastyqty talqylady
Bul jıynǵa Túrkııa, Ázerbaıjan jáne Qyrǵyzstannyń jastar isi jáne sport memlekettik organdary basshylarymen birge QR Din isteri jáne azamattyq qoǵam vıtse-mınıstri Berik Aryn qatysýda.
Otyrys barysynda qatysýshylar Jastar jáne sport salasyndaǵy yntymaqtastyq boıynsha jumys tobynyń qyzmetin, Túrki keńesiniń jastar platformasynyń reglamentin retteıtin qujattardy maquldady, sondaı-aq Túrki keńesi elderinde ótetin III Kóshpendilerdiń dúnıejúzilik oıyndary, I Túrki ýnıversıadasy, Túrki keńesi elderiniń II jastar festıvali sııaqty birqatar aýqymdy is-sharaǵa daıyndyq barysyn saralandy.
B. Aryn qatysýshylardy Qazaqstan Respýblıkasynyń Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda kótergen negizgi bastamalarymen tanystyra kele, ulttyq qundylyqtarymyz ben tarıhymyzdy, salt-dástúrimizdi, mádenı eskertkishterimizdi jańǵyrtýda Túrki keńesi elderimen ózara yntymaqtastyqtyń mańyzdylyǵyn atap ótti.
Sondaı-aq, B. Aryn túrkitildes elderin 2017 jylǵy 10-16 shilde aralyǵynda Aqmola oblysyndaǵy Zerendi aýylynda ótetin Túrki keńesine múshe elder jastarynyń halyqaralyq jazǵy lagerine belsendi qatysýǵa shaqyrdy.
Baký qalasyna sapary barysynda vıtse-mınıstr Ázerbaıjan Respýblıkasynyń dinı uıymdarymen jumys jónindegi memlekettik komıtettiń tóraǵasy Mýbarız Gýrbanly myrzamen eki jaqty kezdesý ótkizdi, onda dinı uıymdardyń qyzmetin retteý máseleleri jáne eki eldiń atalǵan saladaǵy tájirıbeleri talqylandy.
Odan basqa, Baký memlekettik ýnıversıtetiniń rektory Abel Magerramovtiń qabyldaýymen ýnıversıtet janyndaǵy Abaı ortalyǵynda boldy. Atalǵan ortalyqpen jastardy ulttyq mádenıet pen salt-dástúrge daǵdylandyrýǵa baǵyttalǵan jobalardy iske asyrý týraly yntymaqtastyqqa qol jetkizildi.
