Túrki keńesi: Ázerbaıjan Prezıdenti sammıtke qatysty Qazaqstanǵa alǵysyn aıtty
«Osy sammıti uıymdastyrǵandarǵa erekshe alǵysymdy aıtqym keledi. Osy oraıda Qazaqstan Tuńǵysh Prezıdenti Nursultan Nazarbaevqa rızashylyǵymdy bildiremin. Nursultan Ábishulynyń eńbegi zor, Túrki keńesiniń qurmetti tóraǵasy retinde osy sammıtti uıymdastyrýǵa aýqymdy úlesin qosty»,- dedi I. Álıev.
Sonymen qatar Ázerbaıjan Prezıdenti Taýly Qarabaqtaǵy janjaldyń rettelýine qatysty óz pikirin aıtty. Osy oraıda ol bul másele boıynsha ótken jyldarda bolǵan faktilerge toqtaldy.
«Biz ózimizdiń ustanymdarymyz boıynsha jumystardy atqardyq. Qarashada Ázerbaıjan, Reseı prezıdentteri, Armenııanyń Premer-Mınıstri tıisti málimdemege qol qoıdy. Osy oraıda Ázerbaıjannyń jerleri qaıtaryldy. Biz atalǵan aýmaqtaǵy eldi mekenderdi qalpyna keltirý jumystaryn atqaryp jatyrmyz», - dedi I. Álıev.
Sóz sońynda ol atalǵan máselede memlekettiń aýmaqtyq tutastyǵy boıynsha Túrki tildes memleketter yntymaqtastyǵy keńesine jáne basqa da uıymdarǵa alǵysyn aıtty.
Aıta keteıik, beıresmı sammıtti Memleket basshysy Qasym-Jomart Toqaev ashyp, júrgizdi. Jıynǵa Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev, Túrkııa Prezıdenti Rejep Taııp Erdoǵan, Ázerbaıjan Prezıdenti Ilham Álıev, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Gýrbangýly Berdimuhamedov, Vengrııa Premer-mınıstri Vıktor Orban, Túrki tildes memleketterdiń yntymaqtastyq keńesiniń Bas hatshysy Baǵdad Ámireev qatysty.