Túrki keńesi aqparattyq-kommýnıkatsııalyq tehnologııa mınıstrleriniń otyrysy ótti
Alqaly jıynǵa Qazaqstan Respýblıkasynyń Aqparat jáne kommýnıkatsııalar mınıstri Dáýren Abaev, Túrki keńesi Bas hatshysy Baǵdad Ámireev qabyldaýynda, Túrik Respýblıkasy Kólik jáne ınfraqurylym mınıstri Mehmet Jahıt Týrhan, Qyrǵyz Respýblıkasynyń Aqparattyq tehnologııalar jáne baılanys komıtetiniń tóraǵasy Baqyt Sharshembıev, Ázerbaıjan Respýblıkasy kólik, kommýnıkatsııa jáne joǵary tehnologııalar mınıstriniń orynbasary Elmır Velızade, Majarstannyń Aqparattyq kommýnıkatsııalar, ınnovatsııalar jáne tehnologııalar Memlekettik hatshysynyń orynbasary Karol Balash Solımar qatysty.
Bas hatshy Baǵdad Ámireev sóılegen sózinde Túrki keńesine múshe memleketterdiń áleýmettik-ekonomıkalyq damýyndaǵy aqparattyq-kommýnıkatsııalyq tehnologııalardyń rólin atap ótti. Sonymen qatar, Bas hatshy múshe memleketterdiń kıberqaýipsizdik, TASIM jobasy jáne talshyqty ınfraqurylym, spýtnıktik qyzmetter jáne elektrondyq úkimettiń negizgi máselelerin damytý boıynsha yntymaqtastyq aıasyndaǵy mańyzdy birlesken jobalarǵa toqtaldy. Atap aıtqanda, 2018 jyly 3 qyrkúıekte Sholpon-Ata qalasynda ótken Túrki keńesiniń 6-shy sammıtinde prezıdent AKT sektoryna úlken mán berip, osy salada ózara yntymaqtastyqty kúsheıtýge nazar aýdarǵan. Al Túrki Keńesi uıymǵa múshe memleketter arasynda osy saladaǵy yntymaqtastyq pen úılestirý jumystaryna kúsh salýǵa daıyn ekenin bildirdi.
Sonymen qatar, jıyn barysynda QR Aqparat jáne kommýnıkatsııalar mınıstri Dáýren Abaev aqparattyq-kommýnıkatsııalyq tehnologııalar salasyndaǵy tórt negizgi yntymaqtastyq baǵytyna toqtalyp ótti. Sondaı-aq, mınıstr TASIM jobasy barlyq múshe memleketterdiń múddesine qyzmet etetin strategııalyq bastama retinde mańyzdylyǵyn atap ótti. 
Túrkııa Respýblıkasynyń kólik jáne ınfraqurylym mınıstri Mehmet Jahıt Týrhan óz sózinde TASIM jobasyn «Shyǵys pen Batys baılanysyn biriktiretin aqparat jelisi» dep atady. Mınıstr Túrki Keńesiniń yntymaqtastyqtyń nyǵaıtý jolyndaǵy róline toqtalyp, qatysýshy elder arasynda kelisilgen jobalardyń júzege asyrý jóninde birlesken jumysty kúsheıtýge shaqyrdy.Budan bólek, Qyrǵyzstan men Ázerbaıjan ókili de aqparattyq tehgologııalar baǵytyndaǵy yntymaqtastyqty keńeıtýge múddelilik tanytty.
Jıynǵa alǵash ret qatysqan Aqparattyq kommýnıkatsııalar, ınnovatsııalar jáne tehnologııalar jónindegi Majarstannyń Memlekettik hatshy orynbasary Túrki Keńesine múshe memlekettermen tyǵyz yntymaqtastyqqa daıyn ekendiligin atap ótti. Ol Keńeske múshe memleketterdi 2019 jyly 9-12 qyrkúıek aralyǵynda Býdapeshtte ótetin «ITU Telecom World-2019» is-sharasyna qatysýǵa shaqyrdy.
«Bul aýqymdy sharanyń sheńberinde Túrki Keńesiniń aqparattyq-kommýnıkatsııalyq tehnologııalaryna jaýapty mınıstrlerdiń kezdesýin ótkizýdi usynamyz», - dedi Karol Balash Solımar.
Otyrysta TASIM jobasyn ilgeriletý, elektrondyq qoltańba jáne elektrondyq úkimet, sandyq tehnologııalar, kıberqaýipsizdik jáne basqa da salalarda úzdik tájirıbe almasý jaıynda sóz boldy. Birqatar naqty baǵyttar boıynsha yntymaqtastyqty keńeıtý joldary talqylandy.
Jıyn sońynda qatysýshylar otyrys qorytyndysyna sáıkes hattama qabyldady. Túrki keńesiniń aqparattyq-kommýnıkatsııalyq tehnologııalary boıynsha Mınıstrler kezekti otyrysy 2020 jyly Qyrǵyzstanda ótetin boldy.
