Túrki ınvestıtsııa-ıntegratsııalyq qoryn qurýdy tezdetý qajet –Qasym-Jomart Toqaev

NUR-SULTAN. QazAqparat – Túrki ınvestıtsııa-ıntegratsııalyq qoryn qurý jumystaryn tezdetý qajet. Bul týraly Túrki tildes memleketterdiń yntymaqtastyq keńesiniń beıresmı sammıti barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Túrki ınvestıtsııa-ıntegratsııalyq qoryn qurý jumystaryn tezdetý qajet. Bul - bizdiń elderimizge ortaq alǵashqy qarjy ınstıtýty. Bastamany barlyq múshe memleketter pysyqtaǵan soń onyń shtab-páterin Astana halyqaralyq qarjy ortalyǵynda ornalastyrýdy usynamyn», - dedi Memleket basshysy.

QR Prezıdenti Astana qarjy ortalyǵy halyqaralyq bedeldi qarjy ınstıtýttarynyń úzdik tájirıbesi men zamanaýı múmkindikterin biriktirgen biregeı alań ekendigin basa aıtty.

«Munda ıslam bankıngi jáne sýkýk quraldary keńinen qoldanylady. Bul uıym Túrki elderine keń kólemde ınvestıtsııa tartýǵa jol ashatyn erekshe qurylym bolmaq», - dedi Qasym-Jomart Toqaev.